Трамп адмовіў Пуціну, Лукашэнка прапануе Мінск: дзе напішуць сцэнар міру? Эфір

Дональд Трамп і Уладзімір Зяленскі адмовіліся ехаць у Маскву на сустрэчу з Пуціным. У той жа час Лукашэнка праз Наталлю Эйсмант дэманструе гатоўнасць арганізаваць перамовы “на вышэйшым узроўні”.

Ці можа Беларусь зноў апынуцца ў цэнтры міжнароднай гульні, і што гэта будзе азначаць для самога Лукашэнкі?

Тым часам у Вашынгтоне пачынаюць прапрацоўваць новую сістэму гарантый бяспекі для Украіны — з удзелам ЗША, еўрапейскіх саюзнікаў і Кіева. Трамп публічна заклікае Пуціна “быць рэалістам” і настойвае на тэрытарыяльных кампрамісах.  Паралельна гэтаму ён заяўляе, што вяртанне Крыма Украіне і яе ўваход у NATO немагчымыя, але задае пытанні Віктару Орбану пра блакаванне ўкраінскай еўраінтэграцыі. 

Трамп прагназуе, што ў выніку здзелкі Украіна атрымае “шмат зямлі”, але мусіць праявіць “гнуткасць”. 

Ці гатовы Захад насамрэч навязаць Украіне мір “любой цаной”, чым можа скончыцца ідэя перамоўнай пляцоўкі ў Мінску, а таксама ці здольныя беларускія дэмакратычныя сілы пасля КНБ-2025 уключыцца ў новы этап рэгіянальных перамоваў

Пра гэта ды іншае ў жывым эфіры Еўрарадыё размаўляем з палітычным аналітыкам  інфармацыйнага агенцтва "Позірк" Аляксандрам Класкоўскім. 

Асобная тэма — маральная калізія для апанентаў Лукашэнкі: легітымацыя дыктатара ў абмен на магчымасць вызвалення палітвязняў.

Таксама закранем і ваенны фактар: вучэнні “Захад-2025”, ядзерныя пагрозы з боку Масквы і Мінска, і тое, ці ўяўляюць гэтыя сігналы рэальную небяспеку для суседзяў. 

Эфір пачнецца 20 жніўня а 13:00 па Мінску, задавайце пытанні!