Таму ніякіх выплат за транзіт па новай трубе, што праляжа па беларускай зямлі, расіяне рабіць не збіраюцца. Так пракаментаваў эканаміст Леанід Заіка даручэнне “прапрацаваць пытанне будаўніцтва другой ніткі газаправоду “Ямал-Еўропа”, якое даў Уладзімір Пуцін “Газпраму”.

Леанід Заіка: “Існуючая труба, існуючы трансфер знаходзіцца ва ўласнасці “Газпрама”. Усё! Таму яны самі ўсе пытанні і вырашаюць. І Беларусь з гэтага нічога не будзе мець. Яна будзе мець толькі нейкія падаткі з “Белтрансгаза”, якія той будзе выплачваць па выніках сваёй гаспадарчай дзейнасці. А людзі, якія працуюць на “Белтрансгазе”, будуць атрымліваць заробак — не больш за тое”.

Раней кіраўнік Беларусі неаднаразова выказваў шкадаванне, што расіяне не жадаюць пракладаць праз нашу тэрыторыю другую нітку газаправоду “Ямал-Еўропа”. Але як толькі “Белтрансгаз” канчаткова стаў уласнасцю “Газпрама”, яны пачалі гэта пытанне ўсур’ёз абмяркоўваць. І плануюць рэалізаваць праект да 2018-2019 года. Ужо нават пралічылі, што змогуць праз новую нітку прапампоўваць у Еўропу да 15 мільярдаў кубаметраў газу. Былі праведзеныя ўжо карпаратыўныя перамовы з палякамі, венграмі і славакамі.

Да ўсяго, нагадвае Заіка, новая труба дазволіць “Газпраму” пазбавіцца залежнасці ад Украіны. Праз яе цяпер ідзе да 70% транзіту расійскага газу ў Еўропу.

Эксперт: Праект “Ямал-Еўропа-2” — чарговы праект па “распіле бюджэту”

Фота — ria.ru