Спекулянт квіткамі: Пысу разаб’ю. Я плачу ўсім, а яны кліентуру адбіваюць
Журналіста Еўрарадыё ля кас прынялі за спекулянта, калі ён вывучаў попыт на квіткі на матч БАТЭ—"Барселона".
“Па 700 тысяч. 29 сектар 19 шэраг”, — гаворыць голас на тым канцы тэлефона. Прадаецца толькі адзін квіток на гульню БАТЭ—"Барселона", можна набыць і за долары, па курсе 7 тысяч рублёў.
Нагадаем, квіткоў на "Барселону" ў касах няма з 24 верасня. Вось і другая прапанова, якую знаходжу праз інтэрнэт.
Прадавец квіткоў: "Ёсць адзін камплект, 1 катэгорыі. Гульні з "Барселонай", "Міланам" і "Вікторыяй". Каштуе мільён".
Еўрарадыё: "А скінуць крыху? Нешта дорага…"
Прадавец: "Гэта не дорага. Гэта плюс 300 тысяч да пачатковага кошту".
Праўда, камплект такі ў яго толькі адзін. Не спекулянт.
Каб набыць квіткі на цэлую кампанію, накіроўваюся да касаў стадыёну “Дынама”. Там два чалавекі: мужчыны сярэдняга веку.
Адзін падыходзіць да мяне, паказвае на тэлефоне СМС: “Ці прадаеце квіткі?”. “Нямы” прымае мяне за прадаўца.
Праз пару хвілінаў падыходзіць іншы.
— Вы ведаеце, тут камерсанты квіткі прадаюць? Я ў хлопца ў ламбардзе пытаў, ён кажа, прадавалі ўчора па 45 долараў.
Праз гадзіну чакання з’яўляецца малады хлопец. Першымі да яго падыходзяць два мараканцы і пытаюць пра квіткі па-ангельску. Хлопец не разумее, раіць ім пачакаць. Наступным падыходжу я.
Еўрарадыё: "Пачым квіткі?"
Прадавец: "60 долараў, 24 сектар".
Еўрарадыё: "Учора, здаецца, па 45 прадавалі".
Прадавец: "Дзе!? Я ім пысу разаб’ю. Я тут плачу ўсім, а яны нікому не плацяць і кліентуру ў мяне адбіваюць".
У хлопца можна было набыць нават 10 квіткоў! На кожным з іх ён зарабляе 368 тысяч. Калі квіткоў 10 — гэта будзе ўжо больш за 3,5 мільёны.
У сталічнай падатковай Еўрарадыё гавораць, што спекулянтаў Лігі чэмпіёнаў ужо ловяць.
“Гэта незаконная прадпрымальніцкая дзейнасць. Штраф да 100 базавых велічыняў і канфіскацыя прадметаў адміністратыўнага парушэння”, — гавораць у мінскай падатковай.
Квіткі адбяруць, няўдалы прадавец заплаціць максімум — 3,5 мільёны. Што можна лёгка зарабіць на продажы 10 квіткоў. Але калі чалавек перапрадаў квіток за тую ж суму, што і набыў у касе, то ніякай адказнасці ён не нясе, прызнаюць у падатковай інспекцыі.
