Пасля пераацэнкі долара сярэдні заробак у Беларусі стаў $385 — як год таму

За паўгода, якія прайшлі пасля прэзідэнцкіх выбараў, сярэдні заробак у Беларусі ў пераліку на долары “упаў” амаль на 22%. Пасля таго, як 11 траўня камерцыйныя банкі выставілі ў сваіх абменных пунктах курс у 3 тысячы 990 рублёў за долар, у пераліку на валюту ЗША сярэдні заробак складае прыкладна $385. Апошні раз беларусы атрымлівалі так мала роўна год таму, у траўні 2010 года.

Па апошніх звестках Нацыянальнага статыстычнага камітэта, сярэдні заробак за сакавік 2011 года ў Беларусі склаў 1 мільён 537,2 тысячы рублёў. Прыкладна столькі ж беларусы ў пачатку траўня атрымалі за красавік 2011 года. Калі перавесці гэтыя грошы ў долары па курсе, які з 11 траўня прапануюць насельніцтву беларускія “абменнікі” (3990 рублёў за долар), атрымаецца $385,2.

Са снежня 2010 года, калі сярэдні заробак у Беларусі дасягнуў $500 (тады долар у пунктах абмена валют можна было набыць прыкладна за 3050 рублёў), заробкі беларусаў “упалі” на $115, ці амаль на 22%.

Апошні раз беларусы атрымлівалі каля $385 у траўні 2010 года. Тады сярэдні заробак (паводле звестак з belstat.gov.by) складаў 1 мільён 158,4 тысячы рублёў, а курс долара ў абменных пунктах камерцыйных банкаў вагаўся вакол 3020 руб/USD.