Неафіцыйны Саюз палякаў сабраў грошы для сям’і Андрэя Пачобута
Сабраныя сродкі жонцы зняволенага журналіста “Газеты выборчай” Аксане перадалі 31 траўня ўвечары на сходзе арганізацыі, які праходзіць у Гродна кожны аўторак.
Грошы ўручыла выканаўца абавязкаў старшыні Саюзу палякаў Анжаліка Арэхва, паведамляе Радыё Свабода. Аксана Пачобут падзякавала ўдзельнікам арганізацыі, у якой яе муж з’яўляецца старшынём Галоўнай рады. Беларускія ўлады адмаўляюцца зарэгістраваць Саюз.
Андрэй Пачобут з’яўляецца карэспандэнтам польскай “Газеты выборчай”. Яму пагражае ад 2 да 4 год турмы за нібыта паклёп і абразу прэзідэнта. Журналіст знаходзіцца ў Гродзенскім СІЗА ад пачатку красавіка.
