На Гродзеншчыне забаранілі кінафэст Cinema Perpetuum Mobile
Гродзенская вобласць стала адзінай у Беларусі, дзе гэты міжнародны фэст кароткаметражных фільмаў не адбыўся.
Гродзенцам, якія набылі квіткі, прапанавалі паглядзець "Ганну Карэніну". Такая ж сітуацыя з фэстам склалася і ў Лідзе, піша газета "Вечерний Гродно".
Пасля таго як мерапрыемства ўжо стартавала, выявілася, што фэст у Гродне арганізаваны без дазволу аддзелаў культуры і ідэалогіі гарвыканкама. Пра гэта заявіў дырэктар "Гроднакінавідэапракату" Юрый Аляксей.
У каардынатаркі фэсту ў Гродне Юліі Каляды іншая версія. Па яе словах, у мерапрыемстве ўгледзелі камерцыйны падтэкст і вырашылі, што яно фінансуецца з невядомых крыніц. Насамрэч, кажуць арганізатары, фэст ладзіцца сіламі валанцёраў.
Па словах заснавальніка і каардынатара Cinema Perpetuum Mobile у Беларусі Аляксандра Мартынюка, ні ў адным горадзе краіны асобнага дазволу ад мясцовых улад не патрабавалася. Фэст прайшоў у васьмі гарадах Беларусі і яшчэ ў 14 краінах свету.
Фота — artaktivist.org
