Ладуцька распавёў пра будучыню Мінска

У бліжэйшыя выхадныя Мінск будзе адзначаць дзень горада. Напярэдадні гэтага свята мэр беларускай сталіцы Мікалай Ладуцька сабраў журналістаў, каб расказаць пра зробленае і падзяліцца планамі на будучыню.

Найперш, Ладуцька пахваліўся, што вынікі сацыяльна-эканамічнага развіцця горада выглядаюць вельмі станоўча: запасы на складах некалькі зменшыліся, а экспарт мінскай прадукцыі вырас. Гэта, паводле словаў мэра, дазваляе і павялічваць заробкі бюджэтнікаў, і ўкладаць дадатковыя грошы ў развіццё гарадской інфраструктуры.

Мікалай Ладуцька: “Сёння ў Мінску ў стадыі будаўніцтва знаходзіцца тры транспартныя развязкі: вуліца Кальварыйская, вуліцы Маякоўскага-Дзянісаўская, праспект Дзяржынскага-праспект Жукава. Гэта маштабныя аб’екты, якія вельмі дорага каштуюць. Але яны патрэбныя гораду для вырашэння транспартных праблем, якія сёння пачынаюць завязвацца ў горадзе. Мы павялічылі на 50 мільярдаў рублёў асігнаванні на будаўніцтва метрапалітэна. Для таго, каб мець дынаміку развіцця гэтага стратэгічнага для Мінска аб’екту”.

Еўрарадыё пацікавілася ў мэра сталіцы, што чакае дом па вуліцы Ўманская, які плануецца знесці ў сувязі з будаўніцтвам метро. Як ўжо паведамлялася, тры сям'і збіраюцца перасяліць у дзве кватэры на ўскрайку горада, а дом зруйнаваць.

Мікалай Ладуцька: “Яго ніхто не руйнуе, а можа і не будзе руйнаваць. Чалавек сам зрабіў у доме надбудову і сёння кажа, каб мы яму гэтую надбудову аформілі афіцыйна. А тады горад паводле рыначнага кошту павінен яму выплаціць 200 тысяч долараў. Мы кажам: “Таварыш, мы табе даем дзве кватэры трохпакаёвыя, пераязджай!” Ён лічыць, што гэтага яму недастаткова. Сутнасць пытання эканамічная. Там няма ніякай палітыкі, няма ніякага замаху на правы. Таму, можа, мы і руйнаваць яго не будзем”.



Расказаў Ладуцька і пра тое, што Мінск працягвае будавацца. Ужо цяпер пачаліся працы па ўзвядзенні новых жылых мікрараёнаў за Мінскай кальцавой дарогай. Вызначаныя і арганізацыі, якія забудуюць мікрараёны Шчомысліцы, Дзегцяроўка і Ельніца. Яны ўжо праектуюць тэрыторыі забудовы.

Еўрарадыё пацікавілася, у якой стадыі знаходзіцца рэалізацыя праекта “Мінск-сіці” на тэрыторыі аэрапорта “Мінск-1”.

Мікалай Ладуцька: “Сёння тэрыторыя ваеннага завода вызваленая ад пабудоў, распрацаваны праект па будаўніцтве на гэтай тэрыторыі адміністрацыйнага будынка, распрацаваны праект гандлёвага комплексу на 5 тысяч квадратных метраў, распачатае будаўніцтва некалькіх жылых дамоў. Сёння забудоўшчык, кампанія “Мінск-сіці”, вядзе распрацоўку праекта на забудоўлі ўсёй тэрыторыі аэрапорта. Праект вельмі маштабны, велізарны. Але будзем рэалістамі: я лічу, што тыя эканамічныя ўмовы, якія створаныя для рэалізацыі праекта, у асноўным дазваляюць рэалізоўваць гэты праект, але гэта патрабуе часу”.

Праўда, паабяцаў, што да запланаванага 2020 года “Мінск-сіці” будзе здадзены.

Да ўсяго Ладуцька парадаваў тым, што горад закупіў 107 новых аўтобусаў, што хутка на прыпынках будуць электронныя табло з пазначаным часам прыбыцця грамадскага транспарту. Расказаў, што для інвалідаў у горадзе будуць ствараць неабходную інфраструктуру і што хутка ў крамах ізноў з’явіцца грэчка. Праўда, ўжо на 1 тысячу даражэй.