Крыкуноў: Ніякіх пытанняў паміж мной і зборнай Беларусі не засталося!

03/06/2011 - 13:54

31 траўня падчас апошняга выканкама Федэрацыі хакея яе старшыня Яўген Ворсін паабяцаў цягам тыдня прызначыць новага галоўнага трэнера нацыянальнай зборнай. У пятніцу Еўрарадыё датэлефанавалася да Уладзіміра Крыкунова — асноўнага прэтэндэнта на гэтую пасаду.

“Не, яшчэ не прызначылі... Хаця мы ўвесь час знаходзімся з Яўгенам Мікалаевічам на сувязі, і ніякіх пытанняў паміж намі не засталося, — распавёў спецыяліст. — Проста я на сённяшні дзень не ведаю, дзе я працую. Вы ж ведаеце, са зборнай Расіі складаная сітуацыя. З аднаго боку, Білялетдзінава ўжо адпусцілі з “АК Барса”, а з іншага — яшчэ не прызначылі ў зборную. Калі ён ідзе туды — ён цалкам вызваляецца ад клубнай працы, і ёсць такі варыянт, што мяне могуць перакінуць у “АК Барс”.

Па словах адмыслоўцы, менавіта праз гэтую нявызначанасць ён дагэтуль і не прызначаны трэнерам зборнай Беларусі:

Уладзімір Крыкуноў: “Я зараз, здаецца, пакуль што ў “Нафтахіміку”, і яшчэ не ў “АК Барсе”. Паміж двума клубамі. А размаўляць трэба менавіта з клубам… З якім — я пакуль што не ведаю. Кантракт у мяне ў “Нафтахіміку”. Але ёсць варыянт, што я апынуся ў “АК Барсе”. І таму мне сказалі: “Пачакай, пачакай пакуль што, пачакай. Усё!”.

Пытанне вырашаецца вельмі марудна, бо трэнер казанскага “АК Барса” Зінэтул Білялетдзінаў пакуль што ў перамовах не ўдзельнічае:

Уладзімір Крыкуноў: “Білялетдзінава няма папросту, ён у адпачынку. Усё вырашыцца 12-13 чэрвеня”.

Цікава, што Уладзімір Крыкуноў ужо ўзначальваў “АК Барс” у пачатку 2000-х (“срэбра” чэмпіянату Расіі ў 2000 годзе). У 2001-м ён перайшоў адтуль у іншы клуб з Татарстана — ніжнекамскі “Нафтахімік” — а праз нейкі час узначаліў і зборную Беларусі. Нашу каманду ён прывёў да 4 месца на Алімпіядзе ў Солт-Лэйк Сіці (праўда, на наступны год яна ўмудрылася вылецець з мацнейшага сусветнага дывізіёна), а “Нафтахімік” вывеў у 8 топавых каманд расійскай суперлігі.

У 2004 годзе Уладзімір Крыкуноў працягнуў кар’еру трэнера ў маскоўскім “Дынама”, з якім у 2005-2006 гадах выйграў чэмпіянат Расіі і Кубак еўрапейскіх чэмпіёнаў. З 2008 года ізноў трэніруе “Нафтахімік”, які ў першы ж сезон вывеў у 1/8 фіналу КХЛ, а пасля двойчы выводзіў у плэй-оф.