Калі акцызы на піва будуць як у Расіі, мы ператворымся ў гарэлкавую краіну

Паводле “антыкрызіснага плана” беларускага ўрада, кошты акцызаў на алкагольную прадукцыю будуць набліжацца да расійскіх. Канкрэтных лічбаў дакумент не змяшчае, зразумела толькі, што піва падаражае. На думку дырэктара ТАА “Лідскае піва” Аўдрыюса Мікшыса, “аптымізацыю ставак акцызаў” (менавіта такая фармулёўка ўжытая у Пастанове № 662) першымі адчуюць не вытворцы і не імпарцёры, а аматары пеннага напою:

Аўдрыюс Мікшыс: “Падаражэнне акцыза, вядома, выклікае падаражэнне прадукцыі. Бо ўсе акцызы: і на тытунь, і на гаруча-змазачныя матэрыялы, і на моцны алкаголь, і на піва – аплочвае спажывец. Ён у ланцужку спажывання апошні. Так ва ўсім свеце”.

У Расіі акцыз на піва з доляй спірта 0,5 – 8,6% каштуе 10 рублёў на літр (1.787 беларускіх рублёў па курсе Нацбанка), а калі пенны напой яшчэ больш моцны – 14 рублёў (2.503 бел. руб.). Акцызныя маркі на беларускае піва пакуль што каштуюць 350 беларускіх рублёў на літр. Але дырэктар ТАА “Лідскае піва” кажа, што галоўныя наступствы “падгону” нашых акцызаў да расійскіх будуць нашмат глыбейшыя за банальнае падаражэнне. Беларусь можа ператварыцца ў “гарэлкавую” краіну.

Аўдрыюс Мікшыс: “У Расіі зараз так: кошт акцыза на піва і акцыза на гарэлку ў пераліку на грам — 1:1. А ў свеце прынятая іншыя прапорцыі: 1:5 ці 1:10. Калі ў нас рэалізуецца гэтая тэндэнцыя — што ж, будзем гарэлачнай краінай, нічога не зробіш”.

Гэта півавара зусім не радуе:

Аўдрыюс Мікшыс: “Для мяне больш прымальна, калі ў краіне на першым месцы — не моцны алкаголь. Напрыклад, Германія — піўная краіна, Італія — вінная, Францыя — таксама вінная…”

Пакуль жа сітуацыя ў Беларусі такая: “піўны” акцыз у пераліку на градусы таннейшы за “гарэлкавы”.

Аўдрыюс Мікшыс: “Зараз беларускія акцызы на піва і на гарэлку суадносяцца лепш, чым у Расіі. Акцыз на піва ў пераліку на градус таннейшы. Але ён не лепшы, чым сярэдні еўрапейскі (напрыклад, у Літве і г.д.). Усё ж такі, гарэлка тут вельмі і вельмі танная. Думаю, што рашэнні ўладаў могуць быць скарэктаваныя пад уплывам рэалій жыцця. Не час зараз уздымаць акцызы. І без таго ўсё добра даражэе…”.