Генпракурор пацвердзіў затрыманне намесніка Ладуцькі
Першага намесніка кіраўніка Мінгарвыканкама Ігара Васільева затрымалі за атрыманне хабару.
Пра гэта 11 ліпеня паведаміў генеральны пракурор Аляксандр Канюк, перадае БЕЛТА. Іншую інфармацыю генпракурор даць адмовіўся: па яго словах, цяпер ідзе расследаванне.
Нагадаем, што звесткі пра затрыманне чыноўніка з'явіліся яшчэ пару дзён таму. Аднак у Мінгарвыканкаме адмаўляліся пацвярджаць гэтую інфармацыю.
Аляксандр Лукашэнка ўзгадніў прызначэнне Ігара Васільева ў Мінгарвыканкам 4 кастрычніка 2010 года. Гэты чыноўнік курыраваў пытанні энергетыкі, камунальнай гаспадаркі, Тэндарны цэнтр і Гаррэмаўтадар Мінгарвыканкама. Яшчэ 5 ліпеня пад кіраўніцтвам Васільева прайшло паседжанне гарадской камісіі па бяспецы дарожнага руху, на якім разглядалася пытанне парковак на дваровых тэрыторыях. Гэтае паседжанне шырока асвятлялася ў СМІ.
Васільеў нарадзіўся ў 1960 годзе. Да прыходу ў Мінгарвыканкам працаваў дырэктарам Мінскага камбіната сілікатных вырабаў.
Фота — БЕЛТА
