Billy's Bаnd падрыхтавалі чарговую складанку кавераў на сусветныя хіты

12/10/2011 - 11:24

Перад мінскім канцэртам піцерскі гурт Billy's Bаnd распавёў пра хуткі выхад другога альбома кавераў на вядомых выканаўцаў. Паводле слоў лідара калектыву Білі Новіка, дыск "Чужие-2" — амаль вымушаны крок, бо звычайна гурт робіць каверы не па сваім жаданні. Да прыкладу, ім прапануюць выступіць з чужой песняй на якім-небудзь тэлешоў ці пераспяваць песню для канцэрта-салянкі. А калі столькі часу аддаеш на працу з матэрыялам, то шкада яго проста выкідаць. Да таго ж нічога ганебнага ў альбомах з чужымі песнямі няма, лічыць Білі, бо калі да гэтага сур'ёзна ставіцца, то гэта вельмі складаная праца.

Білі Новік: "Мы выкарыстоўваем канцэптуальныя кавер-версіі, каб разбавіць сваю творчасць, каб слухач меў больш шырокую палітру разнастайнасці. Каверы — гэта ўвогуле вельмі тонкая мяжа. Самая галоўная задача кавер-версіі — перавярнуць твор, не апошліць яго, выканаць, як новы. Самая галоўная задача — гэта выканаць яго лепш за арыгінал ці за папярэднік. Але калі кавер атрымліваецца горшым, то ў гэтым проста няма сэнсу".

Нягледзячы на тое, што на складанку трапяць чужыя песні, якія музыкі рабілі цягам апошніх двух гадоў, стылістычна альбом "Чужие-2" атрымаўся самым джазавым і самым англамоўным: з пятнаццаці трэкаў на дыску будзе толькі чатыры рускамоўныя песні. Сярод рускамоўных будуць пераспевы песень "Черный кот" і "Синий-синий иней", вядомай за мяжой як "One Way Ticket".

Праўда, Білі Новік дадае, што менавіта з-за вялікай колькасці англамоўных хітоў выхад альбом "Чужие-2" затрымліваецца. Ён можа з'явіцца ўжо сёлета ўвосень, але, хутчэй за ўсё, узімку, ці, на крайні выпадак, увесну. І гэта залежыць зусім не ад музыкаў калектыву.

Білі Новік: "Рэч у тым, што песні, якія на яго трапяць, — чужыя песні: гэта песні ўжо сур'ёзных аўтараў, такіх, як Beatles, Пол Макартні, Джон Ленан. А ў сур'ёзных аўтараў набыць ліцэнзію проста жахліва. Яны не маўчаць, але, напрыклад, Beatles агучылі такую суму, што нам страшна. Яны не разумеюць, што калі яны нам не дадуць ліцэнзію, то хто-небудзь гэта як-небудзь... і ўсё будзе ўвогуле бясплатна".

А наогул музыкі прызналіся, што ў паўзах паміж канцэртамі яны паралельна працуюць адразу над чатырма новымі дыскамі, але іншых падрабязнасцяў не агучылі.

Што ж датычыцца мінскага канцэрту, то на ім Billy's Band за больш як двухгадзінны выступ амаль не выконваў кавераў, а адпаведна і песень з новага дыску. Але сапраўдным сюрпрызам стала песня Polly гурта Nirvana, якую Білі Новік выканаў самастойна пад гітару і прысвяціў сваім бацькам ды дырэктару гурта. Адзінае, што перашкаджала атрымліваць асалоду ад канцэрта гурта, быў сапраўды дрэнны гук, які, варта прызнаць, бліжэй да канца канцэрта ўсё ж неяк выправілі.