Польшча некалькі разоў адмовіла ў падачы хадайніцтва аб прытулку на мяжы з РБ
На польска-беларускай мяжы / strazgraniczna.pl
Некалькі чалавек атрымалі адмову Польшчы ў падачы хадайніцтва аб прытулку на мяжы з Беларуссю. Пра гэта ў эфіры RMF24 паведаміў польскі міністр замежных спраў Радаслаў Сікорскі.
Абмежаванне на падачу на беларускай мяжы хадайніцтваў аб міжнароднай абароне было ўведзена польскім урадам з 27 сакавіка на 60 дзён. Адзначалася, што забарона не закране ўразлівыя катэгорыі тых, хто мае патрэбу ў прытулку. Само ж новаўвядзенне тлумачылася тым, што памежнікі атрымаюць "адзін з ключавых інструментаў для барацьбы з нелегальнай міграцыяй, якая з'яўляецца элементам гібрыднай агрэсіі супраць Польшчы, а таксама для барацьбы з міжнароднай злачыннасцю".
Сікорскі падкрэсліў, што ў Польшчу нелегальна спрабуюць трапіць праз Беларусь "людзі, прывезеныя расіянамі з Блізкага Усходу". І "атакі" на ўсходняй мяжы Польшчы ўзмацняюцца.
