Памочнік Лукашэнкі не змог высветліць, спраўную тэхніку яму паказалі, ці не

Памочнік Лукашэнкі, інспектар па Гомельскай вобласці Юрый Горлаў не змог высветліць, спраўную тэхніку яму паказалі, ці не. Ён правяраў у Веткаўскім раёне, як сельскагаспадарчыя прадпрыемствы рыхтуюцца да вясновых палявых работ. Калі чытаць раённую газету, то нараканняў падчас візіту не прагучала. Аднак прэс-служба Гомельскага аблвыканкама напісала, як было насамрэч.

Горлаў пабываў у філіяле "Аграфірма імя Лебедзева" РУП "Гомельэнерга". Ён паглядзеў, як захоўваецца сельгастэхніка на тэрыторыі машынна-трактарнага парку, і як яе рамантуюць у механічных майстэрнях.

"Прааналізаваць, спраўная тэхніка ці не, не ўяўляецца магчымым, — заявіў памочнік Лукашэнкі. — Актаў гатоўнасці агрэгатаў, якія павінны быць падпісаны ўнутранай камісіяй гаспадаркі, не аказалася. Па плугах таксама ёсць некаторыя пытанні". Да 1 сакавіка ўсё гэта мусіць быць выпраўлена.

Наведаў Юрый Горлаў і жывёлагадоўчы комплекс, дзе паглядзеў, як захоўваюцца кармы, якія ўмовы ўтрымання жывёлы, "ацаніў аб'ёмы вытворчасці". Відаць, таксама знайшоў хібы. "Па жывёлагадоўлі яшчэ трэба папрацаваць", — сказаў ён. Пры гэтым адзначаецца, што інспектар наведаў гаспадарку, якая "павінна быць адной з паказальных".

Тлумачэнні госцю даваў прысутны старшыня Веткаўскага райвыканкама Раман Сяргун.