Палітвязня Ігара Аліневіча перавялі ў калонію Віцьба-3
Сваякі атрымалі афіцыйнае паведамленне, што Ігар цяпер знаходзіцца ў турме непадалёк ад Віцебска.
Ад самога зняволенага пакуль не было вестак.
Як адзначае Радыё Свабода, пасля прэзідэнцкіх выбараў 2006 года ў Віцьбе-3 адбываў пакаранне экс-кандыдат у прэзідэнты Аляксандр Казулін. Аднак пра парадкі ў гэтай турме былы палітвязень нічога не можа сказаць, бо з тых часоў у калоніі змяніўся начальнік.
Ігар Аліневіч раней адбываў пакаранне ў калоніі ў Наваполацку, якая лічылася самай дрэннай паводле экалогіі. У пачатку года было прынятае рашэнне расфармаваць яе.
Актывіст анархісцкага руху Ігар Аліневіч асуджаны на 8 год зняволення за хуліганскія дзеянні ў дачыненні афіцыйных будынкаў. Сваёй віны палітвязень не прызнаў.
