Лукашэнка прапанаваў журналісту ВВС узяць на парукі палітвязняў

Паручальнікамі могуць быць дзеяздольныя бацькі, паўналетнія сваякі, блізкія людзі, якія працавалі або вучыліся з асуджаным. Паручальнік бярэ на сябе матэрыяльную адказнасць, калі вызвалены здзейсніць паўторнае злачынства. У заканадаўстве не ўдакладняецца, ці могуць замежныя грамадзяне выступаць паручальнікамі.

Хто ў Беларусі выступаў паручальнікам за палітвязняў?

У 2023 годзе "Наша Ніва" пісала, што за вызваленых супрацоўніц TUT.by паручыліся на той момант дэпутат Валерый Варанецкі, палітолаг Яўген Прэйгерман і бізнесмен Аляксандр Швец.

Пасля вызвалення палітзняволеныя супрацоўніцы найбуйнейшага беларускага медыя з'ехалі з краіны. Паручальнікі атрымалі штраф у памеры 18,5 тыс. рублёў кожны (каля 5,3 тыс. долараў).

Хто такі Стыў Розэнберг

Журналіст ВВС Стыў Розэнберг прыехаў у Мінск і задаў пытанні Аляксандру Лукашэнку ў дзень выбараў. Розэнберг вядомы па інтэрв'ю з Лукашэнкам, якое ён правёў неўзабаве пасля выбараў 2020 года. Шмат каму запомніўся спакойны стан журналіста, з якім ён праводзіў інтэрв'ю — і нервовая рэакцыя беларускага палітыка на пытанні пра апанентаў.

На гэты раз Розенберг не праводзіў інтэрв'ю з Лукашэнкам, але стаў адным з замежных журналістаў, якія ў дзень выбараў змаглі патрапіць на ягоную прэс-канферэнцыю.