Краіны ЕС падрыхтавалі свой варыянт мірнага плана па заканчэнні вайны ва Украіне

Еўрапейскія краіны перадалі ЗША свой варыянт мірнага плана па ўрэгуляванні вайны ва Украіне. Пра гэта паведамляе выданне Der Spiegel са спасылкай на крыніцы.

У ЕС лічаць, што план ЗША можа стаць асновай для ўрэгулявання, але патрабуе дапрацоўкі. Паводле папярэдняй інфармацыі, ЕС прапануе прытрымлівацца прынцыпу недапушчальнасці змены межаў сілавымі метадамі, а таксама не падтрымлівае абмежаванні ў дачыненні да ўзброеных сіл Украіны.

Акрамя гэтага, крыніцы The Washington Post пішуць, што ў дакуменце прапануецца вярнуць Украіне кантроль над Запарожскай АЭС і Кахоўскай ГЭС.

Зараз АЭС знаходзіцца пад кантролем Расіі. У праекце плана з 28 пунктаў, распрацаваным ЗША, прапануецца запусціць станцыю пад кантролем МАГАТЭ, а электраэнергію размеркаваць напалову паміж Расіяй і Украінай.

Кахоўская ГЭС была захопленая расійскімі войскамі ў 2022 годзе. У чэрвені 2023 года яна была знішчаная выбухам.

Таксама ў еўрапейскай прапанове гаворыцца пра "бесперашкодны праход" па Дняпры для Украіны і кантроль над Кінбурнскай касой.