Кампанія Ілана Маска шукае добраахвотнікаў для ўжыўлення імплантаў у мозг
Neuralink
Кампанія Ілана Маска Neuralink адкрыла набор удзельнікаў для выпрабаванняў нейраімплантаў. Ахвотных уставіць сабе чып у мозг шукаюць па ўсім свеце.
Праўда, падыдуць не ўсе. Зараз Neuralink шукае людзей з паралічам верхніх і ніжніх канечнасцей, выкліканым траўмай спіннога мозга або бакавым аміятрафічным склерозам.
Першы нейраімплант быў устаноўлены на пачатку 2024 года 30-гадоваму Нолану Арба, які быў паралізаваны больш за восем гадоў. Паводле Neuralink, праз сто дзён ён навучыўся кіраваць камп’ютарам сілай думкі: перамяшчаць курсор, гуляць у шахматы і пераключаць музыку. Аднак праз некаторы час імплант часткова аддзяліўся ад тканак мозга — кампанія не ўлічыла натуральнае зрушэнне мозгу.
