Ціханоўская просіць Партугалію растлумачыць зняцце абароны з беларусаў з Украіны
Святлана Ціханоўская / t.me/tsikhanouskaya
Офіс Святланы Ціханоўскай накіраваў запыт ва ўрадавыя структуры Партугаліі пасля рашэння аб зняцці часовай абароны з беларусаў, якія прыбылі туды з Украіны пасля пачатку поўнамаштабнай агрэсіі Расіі. Запыт быў падрыхтаваны па выніках сустрэчы Ціханоўскай з беларускай дыяспарай, у тым ліку прадстаўнікамі ІТ-сектара. Візіт у Партугалію адбыўся 10–11 лістапада, падчас якога лідарка дэмакратычных сіл Беларусі прыняла ўдзел у канферэнцыі Web Summit 2025.
Паводле звестак офіса, мясцовыя ўлады патрабуюць ад гэтай катэгорыі беларусаў пакінуць краіну цягам 20 дзён. Аднак многія з іх раней уцяклі з Беларусі праз рэпрэсіі пасля пратэстаў супраць фальсіфікацыі вынікаў прэзідэнцкіх выбараў 2020 года, таму вяртанне на радзіму або дэпартацыя з’яўляюцца для іх рэальнай небяспекай.
