Беларусы працягваюць ездзіць на сваіх аўто ў Літву. Колькі развярнулі?

26/01/2025 - 18:38

Беларуска-літоўская мяжа / @rubanau_collage

Са жніўня 2024 года ў Літву не пусцілі 90 транспартных сродкаў на беларускіх нумарах, пішуць літоўскія медыя.

У сярэдзіне ліпеня 2024 года Літва, Латвія і Эстонія абмежавалі магчымасць уезду на сваю тэрыторыю для большасці аўтамабіляў, зарэгістраваных у Беларусі. Заяўлялася, што гэтае рашэнне прынялі, каб знізіць рызыку абыходу Беларуссю і Расіяй антываенных санкцый.

"Мы падлічылі, што ў 2024 годзе ў жніўні-снежні не пускалі 80 аўтамабіляў з рэгістрацыйнымі нумарамі BY, у 2025 годзе ў студзені — 10", — паведамляе Мытны дэпартамент Літвы.

Каму ўсё яшчэ можна ездзіць у Літву на BY-нумарах?

Калі Літва забараніла ўезд легкавых аўтамабіляў на беларускіх нумарах, яна кіравалася восьмым пакетам санкцый ЕС. Але рэгламент прадугледжвае магчымасць выключэнняў, і Камісія па каардынацыі міжнародных санкцый ёю скарысталася.

У выніку вырашылі, што ў Літву могуць заязджаць зарэгістраваныя ў Беларусі легкавыя аўтамабілі, калі яны прызначаныя для асабістага карыстання, а іх уладальнікі маюць літоўскую візу ці від на жыхарства ў Літве. Гэтае выключэнне не распаўсюджваецца на юрыдычныя асобы.

У краіну таксама могуць заехаць аўтамабілі на беларускіх нумарах, калі яны належаць грамадзянам ЕС, якія жывуць у Беларусі.

Беларусы актыўна перарэгіструюць аўто ў Літве

Аўтамабілі з беларускімі нумарамі, не перарэгістраваныя ў Літве, могуць знаходзіцца ў краіне не больш за шэсць месяцаў. І пасля ўвядзення абмежаванняў беларускія аўтамабілі ў Літве сталі актыўна перарэгіструюць.

Толькі за палову студзеня 2025 года перарэгістравалі каля ста аўтамабіляў, а за ўвесь леташні студзень іх было толькі пяць — то-бок у 20 разоў менш. Такую статыстыку прыводзіць LRT са спасылкай на кампанію Regitra.

Каму ад гэтага горш?

Дык каму горш ад гэтых абмежаванняў — рэжыму Лукашэнкі ці беларусам?

Некаторыя літоўскія палітыкі лічаць, што скарачэнне актыўнасці аўтамабільнага руху паміж Беларуссю і Расіяй паўплывае на беларускія спецслужбы. Напрыклад, віцэ-старшыня Камітэта па нацыянальнай бяспецы і абароне Сейма Лаўрынас Кашчунас сказаў, што свабоднае перамяшчэнне аўтамабіляў на беларускіх нумарах праз мяжу стварае спрыяльнае асяроддзе для дзеяння разведслужбаў.

Але дарадца Ціханоўскай Франак Вячорка, наадварот, лічыць, што такія абмежавальныя меры перш за ўсё ўдараць не па рэжыме Лукашэнкі, а па яго праціўніках:

"Не думаю, што забарона аўтамабільных нумароў сур'ёзна паўплывае на рэжым Лукашэнкі. Але яна закране людзей, якія падтрымліваюць дэмакратычную Беларусь і Украіну. Ведаю, што многія нашы прыхільнікі пацярпяць праз гэтыя рашэнні".