Беларуса вінавацяць у падпале супермаркета ў Варшаве па заданні разведкі РФ
Арыштаваны за падпал супермаркета беларус Сцяпан К. / паліцыя Польшчы
Грамадзяніна Беларусі Сцяпана К. вінавацяць у падпале шматпавярховай будаўнічай крамы ў Варшаве. Інцыдэнт адбыўся 14 красавіка 2024 года. Мужчына дзейнічаў па заданні расійскай разведкі, заяўляюць у пракуратуры Польшчы.
Падчас пажару згарэла частка супермаркета OBI на вуліцы Радзыміньскай. Шкоду ацанілі на суму больш за 3,5 млн злотых (каля 900 тысяч долараў паводле цяперашняга курсуе).
Паводле версіі абвінавачвання, 13 красіавка беларус разліў у краме лёгкаўзгаральную вадкасць і пакінуў прылады для дыстанцыйнага падпалу. Яны спрацавалі ў ноч на 14 красавіка, выклікаўшы пажар. Сам Сцяпан К. здымаў пажар на тэлефон, а потым частка гэтых матэрыялаў з'явілася на расійскіх прапагандысцкіх сайтах.
"Акрамя таго, устаноўлена, што падазраваны Сцяпан К. здзейсніў названы падпал, дзейнічаючы ў інтарэсах замежнай разведкі, г.зн. разведкі Расійскай Федэрацыі, і па заданні расійскіх спецслужбаў", — падкрэслілі ў пракуратуры.
Па абвінавачанні ў дыверсіі ў інтарэсах замежнай выведкі і тэрарыстычным злачынстве мужчыну пагражае ад 10 гадоў да пажыццёвага зняволення.
У пракуратуры кажуць, што мужчына з'яўляецца фігурантам расследавання па справе арганізаванай злачыннай групы, якая займаецца вярбоўкай і арганізацыяй дыверсій. Яму таксама выставілі абвінавачванні па ў шпіянажы і ўдзеле ў арганізаванай злачыннай групе.
Таксама ў пракуратуры паведамілі, што працягваецца расследаванне падпалаў іншых буйных крам у Польшчы і краінах Цэнтральнай і Усходняй Еўропы, у тым ліку ў Літве. Польскія следчыя супрацоўнічаюць з літоўскімі праваахоўнымі органамі.
Летась у польскіх гарадах адбыўся шэраг буйных пажараў — у Варшаве, Уроцлаве, Гданьску ды інш. Польскія праваахоўныя органы неаднаразова казалі пра затрыманне асоб, якія маюць дачыненне да гэтых пажараў і да працы на расійскую разведку.
Раней альянс расследвальнікаў Беларусі паведамляў імя беларуса, затрыманага ў Польшчы ў справе аб падпалах ў 2024 годзе. Гэта Сцяпан Касцючэнка жанаты з дачкой былога генконсула Беларусі ў Гданьску Сяргея Міхневіча. Паведамлялася, што ён з сярэдзіны 2000-х звязаны з ультраправымі групоўкамі нацысцкага кшталту.
