Аўтамабіль экс-палітвязня выставілі на аўкцыён

У Гродзенскай вобласці на электронны аўкцыён "Белюрзабеспячэння" выставілі аўтамабіль, які належаў Дзянісу Кірэшчанку,  асуджанаму па "палітычных" артыкулах. Гэта заўважыў праваабарончы канал "Права маюць".

На продаж выстаўлены Renault Kangoo 1999 года выпуску. Адзначана, што аўтамабіль знаходзіцца ў Навагрудку і ён быў ва ўжыванні. Камплектнасць і працаздольнасць аўто не правяралі.

Пачатковая цана лота — 6000 рублёў. Паводле ацэнкі на сайце av.by на снежань 2024 года, прыкладна столькі ж складае і яго рынкавы кошт — 1924 долары, або 6165 рублёў.

Дзяніса Кірэшчанку затрымалі яшчэ перад днём выбараў — 8 жніўня 2020 года ў межах справы аб падрыхтоўцы да ўдзелу ў масавых беспарадках у Наваградку і Карэлічах (ч. 3 арт. 293 КК). Суд прызначыў яму 1,5 года калоніі, якія вязень адбываў у Наваполацкай калоніі №1. На волю Кірэшчанка выйшаў 30 кастрычніка 2021 года, цалкам адбыўшы пакаранне.