Вызвалены палітвязень Арцём Баярскі
Арцём Баярскі / spring96.org
Па памілаванні вызвалены палітвязень Арцём Баярскі. Адбылося гэта яшчэ ў студзені. Былы студэнт хімфака БДУ правёў за кратамі амаль чатыры гады.
Баярскі быў вельмі паспяховым і перспектыўным студэнтам. Ён чатыры разы станавіўся стыпендыятам спецыяльнага фонду кіраўніка дзяржавы па падтрымцы таленавітай моладзі і адораных студэнтаў і навучэнцаў. У 2020-м адмовіўся ад прэзідэнцкай стыпендыі на знак пратэсту супраць падзей у краіне. Ліст у падтрымку Арцёма падпісалі каля 50 членаў Расійскай акадэміі навук, у тым ліку 15 акадэмікаў, 26 членаў-карэспандэнтаў і 6 прафесараў.
У снежні 2021-га Мінскі гарадскі суд асудзіў Арцёма Баярскага на 5 гадоў калоніі ўзмоцненага рэжыму. Яго прызналі вінаватым у "стварэнні і кіраўніцтве экстрэмісцкім фармаваннем", а таксама "ва ўдзеле ў дзеяннях, якія груба парушаюць грамадскі парадак". Паводле версіі следства, Баярскі адміністраваў "экстрэмісцкі" рэсурс.
Прапагандыст Юрый Васкрасенскі таксама назваў яшчэ чатырох палітвязняў, вызваленых па памілаванні — Жарло (праваабаронцам пра яго нічога невядома), Аляксандр Грыдзюшка, Алена Бурлакова і Аляксандр Зубкоў.
