Вярхоўны суд Беларусі пачаў разглядаць справу, якую “дапамог раскрыць” Лукашэнка
27 сакавіка Вярхоўны суд Беларусі пачаў разглядаць справу, якую “дапамог раскрыць” Аляксандр Лукашэнка. У забойстве 38-гадовай жанчыны ў Магілёве ў 2009 годзе абвінавачваюць Юрыя Іванова. Раней ён быў апраўданы. Аднак пасля таго, як да кіраўніка дзяржавы звярнуўся бацька забітай, расследаванне аднавілі.
Лукашэнка сам распавёў пра гэтую сітуацыю: “Я сеў і сам за суткі вывучыў іх [матэрыялы справы]. І даў каманду пракурору і старшыні КДБ, чаго б ні каштавала, расследаваць гэтую крымінальную справу”. Падазраванага ў забойстве знайшлі ў Расіі, дзе ён працаваў, і прывезлі ў Беларусь. Па словах кіраўніка дзяржавы, мужчына ва ўсім прызнаўся: “Высветлілася, што ён забойца. А яго фактычна апраўдалі… Ён прызнаўся, паказаў, як і дзе забіваў”. Аднак у Вярхоўным судзе Іваноў заявіў, што не прызнае сябе вінаватым, інфармуе Радыё Свабода.
Пракурор паведаміў, што абвінавачаны, "знаходзячыся ў стане алкагольнага ап'янення і ўсведамляючы небяспеку сваіх дзеянняў" падчас сваркі нанёс жанчыне не менш за 41 удар нажом. Пасля ён забраў каштоўнасці, тэлефон, пашпарт забітай, спрабаваў учыніць выбух газу ў доме, каб схаваць сляды злачынства. Онлайн з суда гл. тут.
