У Гомелі судзілі жанчыну, якая выкінула з 5-га паверха сабаку

У Гомелі судзілі 43-гадовую жанчыну, якая выкінула з 5-га паверха сабаку. Жывёла загінула. Абвінавачаная сцвярджала, што гэта была выпадковасць. Аднак сведкі казалі пра іншае.

Справу аб жорсткім абыходжанні з жывёлай разглядаў суд Савецкага раёна Гомеля. Здарэнне адбылося ў жніўні мінулага года. Тады загінуў сабака жанчыны Аля. Падзеі 15 жніўня 2024-га яна кепска памятае — была п'яная. Выйшла пакурыць на балкон і ўзяла з сабой сабаку. Неўзабаве ён выпаў з балкона і разбіўся, ад атрыманых цяжкіх траўмаў сканаў. Па словах жанчыны, сабака нібыта вырваўся з рук, калі яна пачала адмахвацца ад дыму цыгарэты.

Аднак сусед засведчыў, што жанчына спецыяльна працягнула рукі і выпусціла сабаку, а пасля яшчэ некалькі секунд стаяла і глядзела (далей з кватэры чулі вясёлыя спевы). Жанчыну асудзілі на тры месяцы арышту. Яе чакае прымусовае лячэнне ад хранічнага алкагалізму.

Падобныя выпадкі ў Беларусі нярэдкія. Летась у Салігорску жанчына выкінула сабаку з акна 9-га паверха, ён загінуў. Ёй прызначылі пакаранне ў выглядзе папраўчых работ на 1 год з утрыманнем у даход дзяржавы 20% заробку. У Бабруйску на тры месяцы арыштавалі мужчыну, які выкінуў сабаку з сёмага паверха.