Стала вядомае прозвішча вызваленага ў Беларусі грамадзяніна ЗША

Стала вядомае прозвішча нядаўна вызваленага ў Беларусі грамадзяніна ЗША (разам з палітвязнямі Андрэем Кузнечыкам і Аленай Маўшук). Гэта 56-гадовы Мікалай Шугаеў. Ён правёў за кратамі пяць месяцаў, паведамляе "Дождь".

Акрамя амерыканскага грамадзянства ў Шугаева ёсць і ўкраінскае грамадзянства (раней ён працаваў ва Украіне ў пракуратуры). У Беларусі мужчына знаходзіўся з 2020 года — прыехаў да сваёй сям'і (у яго маленькі сын).

Мікалай Шугаеў распавёў журналістам, што "менавіта жонка, з якой у яго адносіны сапсаваліся, напісала на яго данос". Жорсткае затрыманне адбылося ў чэрвені 2024-га, яго праводзілі амапаўцы і супрацоўнікі ГУБАЗіКа. Прычынай назвалі падпіску ў Instagram на "экстрэмісцкія" медыя. Чатыры разы ён быў асуджаны на 15 сутак адміністрацыйнага арышту. Адзін з пратаколаў быў складзены за ўкраінскі сцяг на аватарцы ў Telegram. "Я грамадзянін Украіны, я падтрымліваю Украіну", — кажа Шугаеў.

Замежнік назваў умовы ў ізалятары ў Наваполацку катаваннямі. Адтуль яго перавялі ў СІЗА КДБ у Мінск, была распачатая крымінальная справа за "публічную абразу" Аляксандра Лукашэнкі (сілавікі знайшлі нейкі каментар у Instagram). На допытах пыталіся аб тым, ці працаваў ён калі-небудзь на разведку, ці займаўся вярбоўкай.

12 лютага 2025-га Мікалаю Шугаеву надзелі мяшок на галаву, вывезлі на мяжу з Літвой. Там яго сустрэлі супрацоўнікі амбасады ЗША. Цяпер ён знаходзіцца на рэабілітацыі ў медыцынскай клініцы ў Злучаных Штатах. Мужчына кажа, што за час зняволення "страціў 20 кілаграмаў вагі, страціў зрок", а яшчэ "ёсць падазрэнне на сухоты".