Спынена расследаванне па факце нападу на дырэктара праграмы Каліноўскага
Ян Маліцкі / studium.uw.edu.pl
Спынена расследаванне па факце нападу на дырэктара стыпендыяльнай праграмы імя Кастуся Каліноўскага Яна Маліцкага. Варшаўская пракуратура прыняла такое рашэнне ў сувязі з высновай, што "ніякага дзеяння ўчынена не было".
Інфармацыя пра тое, што на прафесара Маліцкага напалі ў Казіміраўскім парку ў Варшаве і ўдарылі па галаве, пасля чаго ён страціў прытомнасць, з'явілася ў снежні мінулага года. Пацярпелы прыйшоў у сябе ў машыне хуткай дапамогі.
Падчас следства пяць разоў быў дапытаны Ян Маліцкі, праведзены допыты 11 сведкаў, вывучаліся запісы відэаназірання. Таксама зробленае судова-медычнае заключэнне аб траўмах прафесара. Мяркуецца, што ён атрымаў траўмы ў выніку няшчаснага выпадку: "пацярпелы спатыкнуўся аб няроўнасць тратуару або прыступак лесвіцы ў Казіміраўскім парку, што магло прывесці да страты памяці, пра што ён сам заяўляў".
