"Па нейкіх акцыях, якія праводзіліся на тэрыторыі Расіі, яны змаглі даказаць, што гэта іх акцыі", — сказаў экс-дэпутат Дзярждумы РФ. Аднак публіцы ніякіх доказаў датычнасці структуры да падпалаў ваенкаматаў (яны ў кадры пад словамі Панамарова) або "рэйкавай вайны" дадзена не было.
Дугіна — далёка не самая відавочная мэта
Па словах Панамарова, НРА "цэліліся" і ў Дар'ю Дугіну, і ў яе бацьку — філосафа Аляксандра Дугіна. Аднак апошнія звесткі пра месцазнаходжанне бомбы (менавіта пад сядзеннем кіроўцы) выклікаюць сумневы ў гэтай версіі. Як і той факт, што бомбу актывавалі дыстанцыйна — гэта значыць забойцы сачылі за машынай і ведалі, што ідэолага-еўразійца ў ёй няма.
Пытанне і ў самой цэлі: Дар'я Дугіна — малавядомы тэлеперсанаж, у яе тэлеграм-канале каля 20 тысяч падпісчыкаў. Для параўнання: у аналагічных прапагандыстаў, таго ж Уладлена Татарскага, іх сотні тысяч.
Заява Панамарова пра тое, што "шмат хто лічыць Дугіну адказнай за абстрэл калоніі ў Аленаўцы", дзе загінулі палонныя "азоўцы", гучыць непераканаўча. Дугіна каментавала гэта ваеннае злачынства, ускладаючы адказнасць за яго на Украіну. Але так рабілі многія расійскія прапагандысты.
Уплыў Аляксандра Дугіна на Уладзіміра Пуціна пры гэтым перабольшваецца. Пра гэта заяўляюць і расійскія аналітыкі (Юлія Латыніна), і ўкраінскія афіцыйныя асобы, напрыклад дарадца кіраўніка МУС Украіны Вадзім Дзенісенка. Так, у сацсетках Дугіна з'едліва называюць "Распуціным Пуціна". Але дакладна вядома, што вакол прэзідэнта Расіі ёсць і іншыя "распуціны". Так што гэта не больш чым метафара, заснаваная не ў апошнюю чаргу на вонкавым падабенстве.
Заяў пра адказнасць шмат
"Нацыянальная рэспубліканская армія" — не першая структура, якой прыпісваюцца шматлікія ці ў прынцыпе ўсе партызанскія і дыверсійныя акцыі праціўнікаў вайны на тэрыторыі Расіі. Вясной у СМІ з'яўлялася інфармацыя пра дзейнасць легіёна "Свабода Расіі", які нібыта вядзе партызанскую барацьбу з пуцінскім рэжымам. Пра яго дзейнасць расказваў і дарадца Офіса прэзідэнта Украіны Аляксей Арастовіч.
