Трэнер хакейнай зборнай Эдуард Занкавец пайшоў у адстаўку

Трэнерскі савет Федэрацыі хакея прыняў адстаўку настаўніка зборнай Эдуарда Занкаўца. На сённяшнім пасяджэнні ў Мінску савет прызнаў выступ каманды на чэмпіянаце свету па хакеі нездавальняючым. Сам Эдуард Занкавец адзначыў, што трэнерскі штаб не справіўся з задачамі.

На пытанне кіраўніка федэрацыі Яўгена Ворсіна, ці гатовы Занкавец працягваць працу са зборнай, трэнер адказаў, што не. У выніку савет рэкамендаваў федэрацыі шукаць кандыдатаў на пасаду галоўнага трэнера і на замяшчэнне пасадаў у трэнерскім штабе.

Па словах Ворсіна, варыянтаў па новым галоўным трэнеры, які будзе рыхтаваць каманду да алімпіяды ў Сочы, шмат. Выканкам федэрацыі разгледзіць адстаўку Занкаўца 31 траўня. Да гэтага ж часу будуць прадстаўленыя і кандыдатуры.

Прапануем вам онлайн з сённяшняга пасяджэння трэнерскага савета і справаздачу Эдуарда Занкаўца:

У Мінску праходзіць трэнерскі савет Федэрацыі хакею Беларусі. "Вынікі чэмпіянату свету нас шчыра расчаравалі", — з такой заявы распачаў свой выступ старшыня Федэрацыі хакею Яўген Ворсін на пасяджэнні спартовай арганізацыі.

"Трэба знайсці шчыры тон, выявіць прычыны таго, што сітуацыя зараз мяжуе з катастрафічнай. Ад 9-га месца, якое гарантуе ўдзел у Алімпійскіх гульнях без кваліфікацыі, мы адстаем на 150 балаў — займаем 11-е месца. І гэта, фактычна, ставіць нас ва ўмовы, што мы будзем удзельнічаць у кваліфікацыі. А вы ведаеце, як складана прайсці праз сіта камандаў, па сіле падобных да нашай. Але задача — трапіць на Алімпійскія гульні 2014 года — не здымаецца".

Тым не менш, пытанне аб адстаўцы галоўнага трэнера зборнай Беларусі Эдуарда Занкаўца не разглядаецца. Савет падобны да школьнай работы над памылкамі. Трэнер каманды Эдуард Занкавец у сваёй справаздачы распавядае, чаму каманда правалілася на чэмпіянаце свету:

Эдуард Занкавец: “Лічу, што графік падрыхтоўкі да чэмпіянату свету быў добры. Гэта і час, адведзены на падрыхтоўку, і падабраныя спарынг-партнёры. У нас у зборнай шмат гульцоў, якія гуляюць у нацыянальным чэмпіянаце. Яны мусілі адчуць упэўненасць…

Шкада, але падчас апошняга этапу падрыхтоўкі, і падчас самога чэмпіянату былі дапушчаныя памылкі. Па-першае, гэта селекцыйныя пралікі. Па-другое, вялікая колькасць пералётаў адбілася на фізічным стане. Па-трэцяе, шэраг гульцоў перанеслі перад чэмпіянатам захворванне. У выніку наш функцыянальны стан быў горшым, чым магло б быць.

У матчы з канадцамі была недакладна абраная тактыка ў 3-м перыядзе – сапернік перайграў нас фізічна. Падчас гульні са Швейцарыяй самым слабым месцам была гульня ў меншасці. Таксама не была знойдзеная камбінацыя троек у пяцёрцы, пры якой мы б змаглі ўдала згуляць у большасці. Гол, які мы прапусцілі ў большасці, гэта пацвердзіў. Перад матчам з Францыяй быў цяжкі маральны стан. Ізноў не рэалізавалі большасць і прапусцілі ў меншасці… Вынік незадавальняючы”.

Яўген Ворсін: “Я бачыў усё, што было на пляцоўцы. Эдуард Канстанцінавіч, мы не маглі зразумець, чаму расклеілася гульня? Калі нехта не ўпісваецца, чаму не змяняецца структура звёнаў? У чым прычына такога рэзкага падзення гульнявых дзеянняў на пляцоўцы? У матчах, якія папярэднічалі чэмпіянату, усё ў нас было: хуткасць, гульня ля варот сапернікаў, дабіванне… Куды ўсё гэта падзелася?”

Эдуард Занкавец: “Трэнерскі штаб не здолеў вызначыць самыя эфектыўныя камбінацыі звёнаў. Перад чэмпіянатам свету прыбылі новыя гульцы, найперш – з Паўночнай Амерыкі. Не скажу, што яны парушылі той стыль гульні, які склаўся ў зборнай. Але ім на адаптацыю быў патрэбны час. Плюс не змаглі падабраць ідэальныя камбінацыі трэнеры. Да гэтага, калі сапернік пачынаў ціснуць і весці ў ліку, у нас не было ўпэўненасці ў тым, што мы зможам пераламіць матч

Нашая самая хворая кропка — абарона. Нашыя абаронцы саступаюць сапернікам у катанні. Праз гэта яны не могуць на належным узроўні падтрымаць атаку. Калі ідзе нашая атака, яны вымушаныя страхавацца і заставацца ззаду. А калі выходзяць у атаку — не паспяваюць зрэагаваць на тое, што сапернік перахоплівае шайбу”.

Яўген Ворсін пытаецца, чаму ў матчы са Швейцарыяй паставілі Грабоўскага ў адно звяно з Касціцыным. Маўляў, "гэтае звяно прынесла нам -4… Атрымалася так, што Грабоўскі абслугоўваў Касціцына, які да матча быў папросту негатовы…”

Эдуард Занкавец: “Яны хакеісты іншага ўзроўню – гэта быў наш галоўны аргумент. І з імі ў звёнах мусяць гуляць хакеісты падобнага ўзроўню. Гэта быў асноўны аргумент пры фармаванні іх супольнага звяна ў гульні са Швейцарыяй”.

Яўген Ворсін працягвае задаваць пытанні. Чаму ў зборнай не было лідара, які мог бы мабілізаваць каманду на гульню, павесці за сабой?

Эдуард Занкавец: "Найперш, шэраг гульцоў да нашай зборнай так і не даехаў... Але я лічу, што ў плане лідарства каманду мог бы ўзмацніць Антонаў".

Яўген Ворсін: "Чаму ў овертайме з Францыяй мы ад пачатку выпусцілі самую слабую пару абаронцаў? Яны абодва падаюць, і нам забіваюць гол – на 43-й секундзе! Угараў на чэмпіянаце свету быў ніякі… Дастаткова было б аднаго прахода да чужых варот, трапнага кідка. Памылка трэнераў тут відавочная".

Эдуард Занкавец: "Овертайм доўжыцца не адну хвіліну, а пяць. Мы разлічвалі на тое, што ён працягнецца долей. Вінаватыя не толькі абаронцы, але і трэнеры, і нападаючыя, якія ў той момант былі на пляцоўцы".

Яўген Ворсін: "Ва ўсіх камандаў больш за 10 гульцоў ростам за 185 метраў. У каманды падбіраюць грэнадзёраў! А мы прайгралі і ў фізічным плане, у хуткасці, і ў тактыцы… Што Коласаў, што Стасенка, што Радзінскі… Ніхто не гуляў першым у шайбу. Радзінскі пачынае атакаваць нападаючага ззаду – і адразу атрымлівае 2 хвіліны штрафу. У нас сумарна 60 хвілінаў выдаленняў! І вы правы: першае ж выдаленне – гэта гол у нашыя вароты. І мы пачынаем з -1…"

Эдуард Занкавец: "Думаю, што сёння нам трэба раўняцца не на фізічную форму і не на габарыты, а на клас гульцоў".

Пытанне з залы: Чаму Мезін і Касцючонак з’ехалі на зборы на адпачынак?

Эдуард Занкавец: Падчас збораў была ў нас запланаваная паўза для адпачынку гульцоў “Дынама”. Але яны не адпачылі ўсе засталіся ў Мінску і займаліся па індывідуальнай праграме…

Пытанне з залы: "Ці дастаткова адной трэніроўкі на дзень? Калі спалучаныя і трэнажорная зала, і лёд…"

Эдуард Занкавец: "Мы не прытрымліваемся нейкай адной методыкі падрыхтоўкі. Але думаю, што ў нашым графіку адной трэніроўкі на дзень дастаткова".

Пытанне з залы: "Чаму Антонаў у зборную не трапіў? Коласаў упершыню на чэмпіянаце, і Радзінскі быў павольны…"

Эдуард Занкавец: "Тое, што мы не падключылі Антонава – гэта, я думаю, памылка. Але хачу сказаць, што прыкладна ўсе абаронцы згулялі на адным узроўні".

Трэнерскі савет перакінуўся на абмеркаванне дзіцячага і юнацкага хакея. І пагадзіўся з тым, што зараз прыцягнуць у зборную каманду Беларусі 10 гульцоў ва ўзросце 19-21 года немагчыма, бо іх папросту няма. 

Міхаіл Захараў, трэнер "Юнацтва": "Пакуль клубы ў нашай краіне не пачнуць плаціць дзіцячым і юнацкім трэнерам у спартовых школах са сваіх кішэняў - нічога ў нас не будзе. Ведаеце, колькі трэнеры адпачываюць за год? Па 4 месяцы! І ім за гэта ніхто не плаціць".

Яўген Ворсін: "Мы заўжды шукаем прычыны нашых праблемаў у слабой дзіцячай школе. Раней было так: кожны трэнер у клубе ведае, якія ў спартовай школе клуба растуць гульцы. Хто са школы ўжо падыходзіць да асноўнага складу каманды. Зараз назавіце мне трэнера, які б ведаў гэтыя прозвішчы... У Гомелі я пытаюся: чаму не працуе вашая спартовая школа? А мне трэнер адказвае: я да працы спартовай школы не маю ніякага дачынення... Захараў слушна кажа: клубы мусяць плаціць трэнерам. Але плаціць за што? За тое, каб яны рыхтавалі тых, хто патрэбен зборнай камандзе. Тых, хто валодае тэхнікай, хуткасцю.

За працай дзіцячых трэнераў мусяць сачыць трэнеры клубаў, трэнеры нацыянальнай зборнай. Я бачыў раскатку зборнай Канады. Пасля таго, як яны адпрацавалі, застаецца на пляцоўцы варатар, два трэнера нацыянальнай каманды і 20-ы нумар. Будучая зорка. І яны пачынаюць з ім працаваць індывідуальна. Хто з беларускіх юнакоў заставаўся пасля раскаткі? А нашыя трэнеры кажуць: дайце нам Харламава... Таму, што лягчэй, чым падрыхтаваць маладога хакеіста, купіць легіянера

Хлопцы, давайце павернемся тварам да сваіх пацаноў! Давайце будзем ставіць іх у склад, давайце адкрыем ім перспектывы гульні за зборную. Інакш яны ўсе з'едуць у Расію".

Міхаіл Захараў: "Праблема №1 беларускага хакея - фізічная форма. Я паслухаў справаздачу Эдуарда Занкаўца, гэта відавочна. Каб трэніравацца зараз, беларускім хакеістам нават лёд не патрэбны. Пастаў заданне па фізічных паказчыках, правер на тэставанні. Ці было зроблена тэставанне зборнай перад чэмпіянатам свету? Не".