Саюз палякаў рыхтуе дапамогу сям’і Андрэя Пачобута
Неафіцыйны Саюз палякаў вырашыў матэрыяльна падтрымаць сям’ю Андрэя Пачобута, які знаходзіцца пад вартай.
На сходзе гродзенскай гарадской арганізацыі Саюзу абралі ініцыятыўную групу з трох асобаў, каб стварыць камітэт дапамогі. Мэта — сабраць грошы для Аксаны Пачобут і яе двух дзетак, перадае Радыё "Свабода". У Саюзе палякаў працягваюць таксама збіраць подпісы пад хадайніцтвам аб змене Андрэю Пачобуту меры стрымання.
Андрэй Пачобут — кіраўнік Галоўнай рады Саюзу палякаў. Ён карэспандэнт польскай "Газэты выборчай". Пачобута вінавацяць у абразе прэзідэнта і паклёпе на яго. У аснове справы — публікацыі журналіста, большая частка якіх узятая з "Газэты выборчай".
