Розніца ў золатавалютных рэзервах па Нацбанку і па МВФ – $1,5 млрд!

Не сакрэт, што Нацбанк і МВФ ацэньваюць Беларускія золатавалютныя рэзервы па-рознаму. Але ў красавіку 2011 года гэтая розніца склала каля 1,5 мільярда долараў, ці больш за чвэрць ад агульнага памеру беларускіх ЗВР у вызначэнні Нацбанка! Ці не зашмат гэта?

Кіраўнік службы інфармацыі Нацбанка Анатоль Драздоў кажа, што сітуацыя цалкам прымальная, а нацыянальная методыка падліку адрозніваецца ад вызначэння МВФ чыста тэхнічна.

“Уся сума, якая атрымліваецца у нацыянальным вызначэнні [$5,340 млрд. – Заўв. Еўрарадыё], у нас ёсць, – кажа спецыяліст. – Але МВФ залічвае ў золатавалютныя рэзервы толькі тое, што ляжыць у замежных банках, якія маюць рэйтынг не меншы за 2А [яны даюць грунтоўныя гарантыі захавання ўнёскаў. – Заўв. Еўрарадыё]. А ў нас не ўсе сродкі ляжаць у гэтых банках, бо яны звычайна даюць не самыя высокія адсоткі. Частку ЗВР мы размясцілі ў другіх банках, не з такім рэйтынгам, але з большай даходнасцю”.

У Міжнародным валютным фондзе Еўрарадыё здзівілі тым, што да падлікаў золатавалютных рэзерваў Беларусі не маюць ніякага дачынення. Маўляў, фонд толькі прапануе адмысловую методыку, прынятую міжнароднай супольнасцю. А канкрэтныя лічбы і па сваім вызначэнні, і па вызначэнні МВФ падлічвае і паведамляе Нацбанк Беларусі.

Анатоль Драздоў: “Па методыцы МВФ заўжды атрымліваецца менш!”

Прычым “менш” апошнім часам – гэта не тое слова. У сакавіку 2009 года розніца паміж золатавалютнымі рэзервамі па Нацбанку і па МВФ складала нейкіх там 488 мільёнаў долараў. А праз 2 гады, у красавіку 2011 года, розніца перавысіла $1,5 млрд.

Золатавалютныя рэзервы Беларусі:

сакавік 2010, Нацбанк $3,814 млрд., МВФ $3,326 млрд. – розніца ў $488 млн.;

люты 2011, Нацбанк $5,579 млрд., МВФ $4,343 млрд. – розніца ў $1,236 млрд;

красавік 2011, Нацбанк $5,340 млрд., МВФ $3,793 млрд. – розніца ў $1,547 млрд;

“Мы кіруем сваімі рэзервамі, – тлумачыць гэтую сітуацыю Анатоль Драздоў. – Змяшчаем іх то там, то там, больш ці менш, у залежнасці ад кан’юнктуры, што складаецца на фінансавым рынку”.

Інфармацыю пра тое, ці часта беларускія ЗВР вандруюць з банка ў банк, Нацбанк не распаўсюджвае з меркаванняў канфідэнцыйнасці. Па словах супрацоўніка Нацбанка, такія звесткі не публікуе ніводзін цэнтральны банк у свеце. Затое Анатоль Драздоў прыадчыніў заслону сакрэтнасці наконт зместа беларускіх рэзерваў.

“Золатавалютныя рэзервы папаўняюцца па-рознаму. Мы можам набыць валюту. А можам і пераацаніць яе, бо курсы валют змяняюцца, а ў нас у ЗВР ёсць і долары, і еўра, і расійскія рублі, і юані. Калі прыбытак прыносяць тыя сродкі, што размешчаныя ў банках – яны таксама залічаюцца ў рэзервы. Чыстая бухгалтэрыя!”

Такім чынам, памер беларускіх ЗВР залежыць, у тым ліку, і ад курса юаня! Усе трымаем пальцы за кітайскую эканоміку і запасаемся спакоем, з якім каментуюць эканамічныя падзеі ў краіне прадстаўнікі Нацыянальнага банка Беларусі.