Пётр Пракаповіч выйшаў на працу аж 5 дзён таму
За 3 працоўныя дні на мінулым тыдні ён паспеў правесці два паседжанні Праўлення Нацыянальнага банка.
Старшыня Нацбанка Беларусі Пётр Пракаповіч вярнуўся на працу пасля хваробы. Гэта адбылося 18 траўня, 5 дзён таму.
"З 18 траўня 2011 года Пётр Пракаповіч афіцыйна вярнуўся да выканання сваіх службовых абавязкаў пасля хваробы, — паведамілі Еўрарадыё ў Нацыянальным банку. — На мінулым тыдні ён правёў шэраг важных сустрэчаў і нарадаў, у тым ліку і міжнародных".
У прыватнасці, Пракаповіч сустрэўся з міністрам фінансаў Расіі Аляксеем Кудрыным і са старшынём расійскага Цэнтрабанка Сяргеем Ігнацьевым. За 3 працоўныя дні ён паспеў правесці два паседжанні Праўлення Нацыянальнага банка.
"На гэтым тыдні Пётр Пракаповіч будзе заняты рашэннем актуальных пытанняў грашова-крэдытнай палітыкі краіны", — дадалі ў Нацбанку.
