Навагоднія прэміі давалі ў прэзідэнцкай адміністрацыі і не далі дэпутатам

120106 Luka6uk Premii.mp3

Неабходнасць “жыць па сродках”, пра што апошнім часам часта кажа кіраўнік краіны, прывяла да таго, што сёлета беларускія чыноўнікі не тое што 13-га заробку — пераднавагоднюю прэмію не ўсе атрымалі!

Дэпутата Палаты прадстаўнікоў Уладзіміра Маёрава гэтае пытанне нават крыху павесяліла.

Уладзімір Маёраў: “Пра што вы кажыце! Мы — дзяржслужба, у нас цвёрдыя заробкі. У нас усё дакладна, цвёрда, як належыць дзяржслужбе”.

Еўрарадыё: “І што, да Новага года нават ніякай прэміі не далі?!”

Уладзімір Маёраў: “А ў нас... дастаткова таго, што ёсць!”

Не бачыў нічога, апроч звычайнага заробку, галоўны дарадца аднаго з упраўленняў Савета міністраў: “Наконт усіх супрацоўнікаў не ведаю, але я не атрымліваў!”

Тыя ж самыя словы Еўрарадыё пачула і ад кіраўніка прэс-службы Міністэрства фінансаў Ірыны Комар, і ад супрацоўніцы Міністэрства адукацыі.

Затое па прызнанні начальніка прэс-службы Міністэрства эканомікі Наталлі Пацэйкі, ўсе супрацоўнікі іх ведамства атрымалі да навагодніх святаў прэмію.

Аднолькавую для ўсіх — ад сакратаркі да міністра: “У нас няма такога паняцця ў Мінэканомікі — 13-ы заробак. А вось прэмія была. Але гэта была проста прэмія да Новага года. Як падарунак навагодні — прэмія і ўсё. Усім пароўну: міністр ты ці не міністр, сакратар ці не сакратар — усіх вось так падтрымалі крыху, і ўсё. Але гэта не аклад, нічога, а так..."

У якіх дакладна лічбах выявілася гэтая невялікая падтрымка, супрацоўніца міністэрства казаць не захацела. Але на спробы Еўрарадыё “намацаць” прыблізныя лічбы раскрыла таямніцу — прэмія была побач з лічбай у 500 тысяч рублёў.

Не засталіся без прэміі і супрацоўнікі Адміністрацыі прэзідэнта. Праўда, назваць памер намеснік кіраўніка гэтай установы Андрэй Тур не здолеў.

Андрэй Тур: “Прэміі ў нас былі, гэта я ведаю — прэміі былі. Але ўсе гэтыя 13-я заробкі, яны, часцей за ўсё, уваходзяць у выплаты па выніках года. Іх складана падзяліць. Вось, ты атрымліваеш заробак па выніках года — там ёсць нейкія прэміі, там ёсць нейкія пытанні, звязаныя з заахвочваннем ці прэміраваннем супрацоўнікаў”.

Кіраўнік краіны паабяцаў, што 2012-ы будзе годам яшчэ большай эканоміі па ўсіх накірунках. Цягам года Еўрарадыё будзе сачыць, як гэта адаб’ецца на заробках і прэміях чыноўнікаў.