На падаражэнні валюты перагоншчыкі аўтамабіляў выйграюць мільёны рублёў

Падаражэнне валюты, што адбылося 11 траўня, прынесла неспадзяваныя выгоды фізічным асобам, якія набываюць аўтамабілі за мяжой. Справа ў тым, што мытная пошліна пры ўвозе машыны ў Беларусь, хаця і разлічваецца ў еўра, але аплочваецца ў беларускіх рублях, прычым пералік адбываецца па курсе Нацбанка. Гэта Еўрарадыё пацвердзілі на адным з мытных пунктаў у Брэсце:

Супрацоўніца мытні: “Растаможка аўто аплочваецца ў беларускіх рублях па курсе Нацбанка”.

Паводле Закона “Аб ільготным перамяшчэнні праз мытную мяжу тавараў для асабістага карыстання”, растаможка легкавіка 2009 года вытворчасці з аб’ёмам рухавіка ў 1350 кубічных сантыметраў каштуе 1350 * 0,6 = 810 еўра. Гэта значыць, што перавозчык мусіў аплаціць за ўвоз аўто мыта ў 3,6 мільёны рублёў (па курсе Нацбанка 4392,84 руб/EUR).

Пасля таго, як Нацбанк “адпусціў” курсы валют, кошт “растаможкі” не змяніўся, але 810 еўра можна здаць ужо за 4,7 мільёны рублёў (810 * 5770). На растаможцы такога аўто пакупнік ашчаджае больш за 1 мільён рублёў.