“Міс Беларусь-2010”: Выйсці замуж, парушыўшы кантракт? Лёгка!

120508 Luka6uk Misski.mp3

Хто не гатовы пасля магчымай перамогі на два гады адмовіцца ад стварэння сям’і — адразу збірайце чамадан. Гэта былі першыя словы, якімі сустрэлі прадстаўнікі канала АНТ канкурсантак, прыгадвае “Міс Беларусь-2008” Вольга Хіжынкова.

Вольга Хіжынкова: “Калі мы прыехалі на першыя кастынгі ў Мінск, усіх паставілі перад фактам. Сказалі: “Дзяўчаты, магчыма, нехта збіраецца ў бліжэйшы час выходзіць замуж. Але калі так складзецца, што вы пераможаце, то ведайце, што замуж мы вас не пусцім. Выбачайце! Але калі вельмі хочацца, то збірайце чамаданы і з’язджайце да сваіх каханых”.

Ад магчымасці стаць каралевай прыгажосці не адмовіўся ніхто. Тым больш, працягвае гутарку “Міс Беларусь-2010” Людміла Якімовіч, гэта добрая магчымасць праверыць пачуцці.

Людміла Якімовіч: “Калі сапраўднае каханне, то два гады — не перашкода. Да таго ж, калі да гэтага не зрабіў прапанову і нешта падштурхнула дзяўчыну пайсці на конкурс, а не пайсці замуж, тым больш гэта не перашкода”.

Асобным пунктам у кантракце прапісана забарона цягам двух гадоў заводзіць дзяцей. "Міс Беларусь-2010" не бачыць у гэтым нічога страшнага: пусціў каханы дзяўчыну на конкурс — павінен змірыцца.

Людміла Якімовіч: “Калі дзяўчына пайшла на конкурс, значыцца нейкая дамоўленасць была, што гэта не зараз. Я, безумоўна, не прапагандую адносіны пазашлюбныя, але ж неяк...”

І хваліцца: прапанову пабрацца шлюбам атрымала! За некалькі месяцаў да заканчэння двухгадовага абмежавання. А як мінулую пятніцу перадала карону Юлі Скалковіч, дык гатовая ў ЗАГС ісці хоць заўтра! Праўда, дадае па сакрэце, калі б каханы рашыўся раней — магчыма, і не чакала б заканчэння кантракту. Маўляў, “не расстралялі б”.

Паводле слоў Вольгі Хіжынковай, складаней з атачэннем, бо ўвесь час нагадваюць дзяўчыне, што ў “дзеўках заседзелася” і “час унукаў бацькам падарыць”.

Вольга Хіжынкова: “Я разумею, што гэта робіцца з меркаванняў самых лепшых, але спрабую супакоіць людзей, што хвалявацца за мяне не варта”.

Не толькі асабістае жыццё абмяжоўвае кантракт. Любую прапанову наконт працы “Міс Беларусь” павінна... узгадніць з кіраўніцтвам канала. У Вольгі Хіжынковай з гэтай нагоды канфліктаў з АНТ не ўзнікала.

Вольга Хіжынкова: “Я ведала, дзе б мне забаранілі, сама б у такім не пагадзілася здымацца. Да прыкладу, на здымкі рэкламы ніжняй бялізны ці паказ яе. У такіх здымках і паказах дзяўчына не павінна ўдзельнічаць пасля таго, як ёй на галаву надзелі карону!”

Людміла Якімовіч упэўнівае, што асаблівых перашкод ад кіраўніцтва тэлеканала не было, і прызнаецца: паступалі “непрыстойныя” прапановы ад... лікёра-гарэлачнага завода!

Людміла Якімовіч: “Ого, Вольга выказалася! Я супрацоўнічаю з кампаніяй “Мілавіца”! Калі фігура прыгожая, калі бялізна ўсё ж прыкрывае пэўныя часткі цела, то чаму б і не?! Мне вось прапанавалі “дарадцам дырэктара лікёра-гарэлачнага завода”. Уяўляеце: “Міс Беларусь” і лікёра-гарэлачны завод!”

Згодна са словамі дзяўчат, кантракт з АНТ хоць і накладаў абмежаванні на асабістае жыццё, але і даваў магчымасць зарабіць.

Вольга Хіжынкова: “Тэлеканал выплачваў ганарар, які дазваляў забяспечваць маё існаванне на той момант. Плюс — нейкая праца, якую прапаноўвалі. Мне хапала!”

З АНТ яна развіталася ўжо некалькі гадоў таму і зараз працуе піяршчыкам на прыватнай фірме. Пры гэтым працягвае ўдзельнічаць у паказах і здымках.

А Людміла Якімовіч рыхтуе... першы альбом ў стылі электрапоп. Выхад прызначаны на ліпень.

Ну, а то, што ніякія штрафныя санкцыі за парушэнне “сямейных” артыкулаў кантракта прыгажунь не прадугледжаныя, пацвярджае Еўрарадыё і прэс-сакратар тэлеканала Таццяна Курбат. Нават выплачаны 50-мільённы ганарар не забіраюць. Адзінае, калі трэба ехаць на “Міс свету”, то замест каралевы тады едзе яе намесніца — “Першая віцэ-міс”. З якой таксама падпісваецца адпаведны двухгадовы кантракт.

Фота: velvet.by, gazetaby.com, grodnonews.by