П'яны паляўнічы пагражаў узарваць дом у Мінску

Увечары 10 студзеня жыхар дома №64 па праспекце Пушкіна паведаміў у міліцыю, што яго сусед пагражае ўзарваць дом. Маўляў, пасля сваркі з суседзямі ён паказаў самаробнае прыстасаванне і заявіў, што прывядзе яго ў дзеянне. Міліцыя тут жа адрэагавала на выклік і затрымала падазраванага, папярэдне эвакуяваўшы жыхароў суседніх кватэр.

Група сапёраў абясшкодзіла "выбухоўку", якая складалася з пораху, батарэйкі, провада і выключальніка. Апроч таго, у кватэры мужчыны аператыўная група канфіскавала пісталет і ружжо для падводнага палявання, 200 грам пораху, 6 мяшэчкаў са шротам, каля 200 спартова-паляўнічых патронаў калібра 5,6 мм і больш за 130 капсюляў. Затрыманы быў п'яны.

Пра гэта Еўрарадыёў распавёў прэс-сакратар мінскай міліцыі Аляксандр Ластоўскі.

Ластоўскі: "Высветлілася, што 62-гадовы мінчук нідзе не працуе, пражывае адзін. Раней з'яўляўся паляўнічым. Але некалькі гадоў таму тэрмін дзеяння адпаведнай ліцэнзіі скончыўся. Па высновах спецыялістаў Дзяржаўнага камітэта судовых экспертыз, знойдзеныя патроны з'яўляюцца боепрыпасамі да агнястрэльнай зброі".

Следства хадайнічае перад пракурорам, каб мінчука ўзялі пад варту і прызначылі судова-псіхіятрычную экспертызу. На яго пачалі крымінальную справу за незаконныя дзеянні з агнястрэльнай зброяй, боепрыпасамі і выбуховымі рэчамі. Мужчыну пагражаюць папраўчыя працы тэрмінам да двух гадоў альбо абмежаванне свабоды да 7 гадоў з канфіскацыяй ці без канфіскацыі маёмасці.

Фота: 360tv.ru