Пасля матча памёр 31-гадовы беларускі футбаліст
Раман Клімаў / фота з яго старонкі ў Інстаграме
31-гадовы гулец медыяфутбольнага клуба "Альтстарт" Раман Клімаў памёр пасля матча. Спартоўцу стала кепска падчас гульні, ён страціў прытомнасць. Пра гэта піша "Наша Ніва" са спасылкай на допісы сяброў хлопца ў сацсетках.
Футбалісту выклікалі хуткую, але дактары не змаглі выратаваць яго: па дарозе ў бальніцу спартовец памёр. Прычынай трагедыі называюць спыненне сэрца.
"Альтстарт" — аматарскі футбольны клуб. У медыяфутбольных камандах могуць гуляць як былыя прафесійныя футбалісты, так і вядомыя асобы накшталт блогераў. Раман клімаў гуляў там на пазіцыі нападніка.
23 лютага "Альтстарт" мусіў правесці матч з клубам Boom, і ў гэты ж дзень у інстаграме каманды з’явілася інфармацыя пра трагедыю з Раманам.
9 сакавіка клуб разам з яшчэ адной медыяфутбольнай камандай — ФК "Інформ" зладзіў матч памяці Рамана Клімава: грошы ад гульні спартоўцы абяцалі перадаць сям’і памерлага футбаліста.
