На палітвязня Мікалая Дзядка распачалі новую крымінальную справу
Мікалай Дзядок / Euroradio
На палітвязня Мікалая Дзядка распачалі новую крымінальную справу. Яго перавялі ў СІЗА ў Калядзічах, паведамілі яго сябры. Што гэта за справа, невядома. Супраць Дзядка ў пачатку восені мінулага года распачалі крымінальную справу аб "злосным непадпарадкаванні адміністрацыі папраўчай установы".
Палітвязень мусіў выйсці на волю 4 красавіка 2025 года.
Блогера і анархіста Мікалая Дзядка затрымалі ў лістападзе 2020 года на канспіратыўнай кватэры ў пасёлку Сасновы Асіповіцкага раёна, дзе ён хаваўся. Яго абвінавацілі па трох артыкулах КК РБ — у "арганізацыі і падрыхтоўцы дзеянняў, якія груба парушаюць грамадскі парадак", у "закліках да дзеянняў, накіраваных на прычыненне шкоды нацыянальнай бяспецы Беларусі" і ў "незаконных дзеяннях у дачыненні да прадметаў, паражальнае дзеянне якіх заснаванае на выкарыстанні гаручых рэчываў". Сваёй віны ён не прызнаў. У лістападзе 2021 года яго асудзілі на 5 гадоў калоніі агульнага рэжыму. Пазней палітвязню ўзмацнілі пакаранне і перавялі на турэмны рэжым.
