На Мінскім моры на пляж выкінула яхту вагой 18 тон
Яхта на Мінскім моры / onliner.by
На Мінскім моры на мель каля пляжа №5 села яхта. На судне былі пасажыры ў выратавальных камізэльках, піша Onlíner.
Здарэнне адбылося 22 верасня.
"Я катаў васьмярых чалавек па Мінскім моры. У нейкі момант кліент папрасіў прышвартавацца ля пляжу №5, дзе працавала крама. Пакуль ён туды хадзіў, змяніўся кірунак ветру — і яхта, якая важыць 18 тон, села на мель амаль ля самага берага! Такое са мной здарылася ўпершыню, вядома", — расказаў журналістам капітан і ўладальнік яхты Аляксандр Маныла.
Вярнуць яхту на ваду, паводле яго, удалося праз некалькі гадзін дзякуючы неабыякавым пасажырам, а таксама адпачывальнікам.
Мужчына кажа, што варыянт з кранам адразу адпаў — праз пясчаную паверхню пляжа. Таму давялося спадзявацца толькі на дапамогу адпачывальнікаў і супрацоўнікаў ратавальнага паста.
