"Інтэграл" абыходзіць заходнія санкцыі і дапамагае Расіі ў вайне супраць Украіны

З'явілася другая частка расследавання пра пастаўку мікраэлектронікі ў Расію з дапамогай беларускіх кампаній. Як піша investigatebel.org, "Інтэграл" абыходзіць заходнія санкцыі і дапамагае РФ у вайне супраць Украіны: яго прадукцыя выкарыстоўваецца расійскай ваеннай прамысловасцю для стварэння ракет і высокадакладнага ўзбраення.

Знаходжанне камплектуючых, вырабленых на "Інтэграле", у расійскіх ракетах пацвярджаюць розныя крыніцы. БРЦ гэта пацвердзілі ў Службе бяспекі Украіны. Яе спецыялісты падчас вывучэння абломкаў ракеты са складу ракетнага комплексу "Калібр" выявілі мікрасхемы з "Інтэграла".

Паводле мытных даных, з сакавіка 2022-га да чэрвеня 2024 года "Інтэграл" паставіў у РФ больш за 6 мільёнаў мікрасхем на больш за 130 млн долараў (гэта 80% ад паставак беларускіх мікрасхем у Расію). Адпаведна істотна вырас чысты прыбытак прадпрыемства — у 2023-м у 11 разоў у параўнанні з 2022 годам.

Вядома, што на "Інтэграле" выкарыстоўваюць заходняе абсталяванне. Напрыклад, нямецкія мікраскопы Axiotron Carl Zeiss AG для кантролю якасці мікрасхем, брытанскія вакуумныя сістэмы Edwards, неабходныя для падтрымання стэрыльнасці ў вытворчых працэсах і г. д. "Інтэграл", нягледзячы на санкцыі, працягвае атрымліваць неабходныя кампаненты і сыравіну з Еўрасаюза. Пастаўкі ідуць праз кампаніі-пасярэднікі з Казахстана, Кыргызстана, Турцыі і Кітая.