Хуліганы ў цэнтры Маладзечна з-за цыгарэты збілі да смерці мужчыну
Завершанае расследаванне крымінальнай справы аб забойстве ў цэнтры Маладзечна 50-гадовага мужчыны. Яго цела знайшлі ўначы 20 ліпеня 2015-га. У выніку праведзенага комплексу следчых дзеянняў і аператыўна-вышуковых мерапрыемстваў з'явіліся трое падазраваных у забойстве — беспрацоўныя мясцовыя жыхары (двое — 1992 гадоў нараджэння, адзін — 1991 года нараджэння). Іх затрымалі.
Як інфармуе прэс-служба Следчага камітэта, мужчына ішоў на працу і сустрэў незнаёмых маладых людзей. На просьбу даць яму цыгарэту, яны пачалі збіваць яго нагамі і рукамі. Было нанесена не менш за 40 удараў. Ад атрыманых цялесных пашкоджанняў пацярпелы памёр на месцы.
Дарэчы, следчыя змаглі высветліць, што ўжо пасля забойства адзін з затрыманых здзейсніў яшчэ некалькі злачынстваў. Ён учыніў крадзеж у інтэрнаце ў Маладзечне, а на тэрыторыі Мінскай вобласці скраў некалькі аўтамабіляў. Легкавікі ўжо знайшлі і вярнулі іх уладальнікам.
Дваім падазраваным выставілі абвінавачанні па артыкуле "забойства, здзейсненае з асаблівай жорсткасцю групай асобаў з хуліганскіх памкненняў". Дзеянні трэцяга затрыманага кваліфікавалі як "забойства, здзейсненае з асаблівай жорсткасцю групай асобаў з хуліганскіх памкненняў", "крадзеж, здзейснены паўторна" і "угон, здзейснены паўторна".
