Фінскі тэлеканал не пакажа матч Лігі нацый паміж камандамі РБ і Фінляндыі
Тэлевізар, ілюстрацыйнае фота
Фінскі тэлеканал Yle адмовіўся весці трансляцыю футбольнага матча Лігі нацый паміж жаночымі зборнымі Беларусі і Фінляндыі. Гульня прызначаная на 4 красавіка.
Таксама Фінская футбольная асацыяцыя не захацела прымаць беларускую зборную на сваёй тэрыторыі, таму матч пройдзе ў Мілане.
Як піша "Трыбуна", такое рашэнне патлумачылі тым, што рэжым Лукашэнкі падтрымлівае расійскую агрэсію супраць Украіны.
"Фінляндыі не пашанцавала з латарэяй. Беларусь адхілена ад удзелу ў большасці міжнародных відаў спорту, але УЕФА прыняў рашэнне дазволіць ёй удзельнічаць. Нам трэба было вырашыць, паказваць ці не. Мы лічым, што зараз непрыдатны час для Беларусі прадстаўляць сваю краіну ў якасці нацыянальнай зборнай у гэтай ваеннай сітуацыі", — патлумачыў менеджэр Yle Sports Ёзэ Паланен.
Ён дадаў, што ні Фінская футбольная асацыяцыя, ні сама зборная не хацелі гуляць з беларускай камандай, але байкот прывёў бы да страты ачкоў і іншых штрафаў.
