Для замежных добраахвотнікаў ва Украіне спрасцілі набыццё грамадзянства

Для атрымання грамадзянства Украіны цяпер замежнаму добраахвотніку будзе дастаткова адслужыць паводле кантракту адзін год замест ранейшых трох. Гэтае спрашчэнне набыцця грамадзянства ўводзяць нядаўна прынятыя ва Украіне змены ў закон аб множным грамадзянстве.  

Пра гэта ў каментары Hromadske заявіў в.а. начальніка аддзела каардынацыі па пытаннях праходжання ваеннай службы замежнікамі ва УСУ Канстанцін Мілеўскі. Ён дадаў, што "шырокага агучвання гэтай навіны не было", а сам закон набудзе моц праз паўгода.

Гэтыя і папярэднія папраўкі аб магчымасці падавацца на ўкраінскае грамадзянства па пратэрмінаваных пашпартах датычаць пераважна беларускіх і расійскіх добраахвотнікаў. "У 95% з 100 — так, гэта будзе тычыцца выключна іх. Бо для прадстаўніка іншай краіны не з'яўляецца праблемай атрымаць іншы пашпарт, калі ў яго скончыўся тэрмін", — патлумачыў Мілеўскі.

Прадстаўнік Мінабароны прызнаў, што замежныя байцы з пратэрмінаванымі і згубленымі дакументамі маюць праблему, але вайсковае ведамства не ў стане яе вырашыць: "Як хутка і якое выйсце з яе знойдуць і як потым імплементуюць у наша заканадаўства — я не ведаю. Бо над гэтым не мы, вайскоўцы, павінны думаць, а дзяржаўныя ўстановы, якія адказваюць за гэта".