"Буслік" зробяць сеткай крамаў з беларускімі таварамі
Крама "Буслік" / greencityminsk.by
Сетку крам "Буслік" чакае трансфармацыя. Брэнд захаваецца, але ў крамах будуць прадаваць беларускія тавары і вопратку для дзяцей. Пра гэта паведамляе партал ilex.by, спасылаючыся на словы міністра антыманапольнага рэгулявання і гандлю Аляксея Багданава.
Кіраўнік ведамства заявіў, што цяпер у гэтым кірунку працуюць з беларускім уласнікам сеткі.
Пра магчымае банкруцтва сеткі "Буслік" загаварылі ўвосень 2023-га. Колькасць крам, якія належаць брэнду, скарачаецца: увосень іх было ў Беларусі 40, а ў студзені 2024-га засталося толькі 14. Польская кампанія CDRL заявіла, што страціла кантроль над даччыным прадпрыемствам у Беларусі, і прыпыніла пастаўкі тавараў.
Кіраўніцтва "Бусліка" звярталася ў Мінгарвыканкам, каб запабегчы банкруцтву. Яны прасілі ўвесці арэндныя вакацыі, перагледзець умовы крэдытнай лініі і павялічыць гандлёвую нацэнку.
