Башура: Большасць людзей, якія сядзяць на Акрэсціна, – прадпрымальнікі

Суд Савецкага раёна Мінска палічыў, што следчыя цалкам даказалі віну актывіста “Гавары праўду!” Міхася Башуры і прысудзіў яму штраф у памеры 6 тысяч долараў. Але сам Башура не прызнае сябе вінаватым у падробцы даведкі для атрымання ільготнага крэдыту ў банку і будзе абскарджваць прысуд. Пра гэта ён заявіў у размове з карэспандэнтам Еўрарадыё.

Міхась Башура: “Прысудам я не задаволены. Мы прасілі, каб мяне апраўдалі цалкам, але гэтага не адбылося. Таму я ўжо ўсё абдумаў і вырашыў, што прысуд мы будзем абскарджваць. І рэч нават не ў тым штрафе, што мне прызначылі. Рэч у тым, што яны нахабна ў прысудзе сцвярджаюць, што яны даказалі мой намер і што яны даказалі тыя выгоды, якія я нібыта з гэтага атрымаў”.



Паводле словаў Башуры, гэтую даведку ён склаў яшчэ летась. І там была простая памылка. Ніякіх жа выгод са свайго “злоснага намеру” ён не атрымаў. Іншае пытанне, чаму гэтая старая даведка “ўсплыла” толькі цяпер.

Міхась Башура: “Пасля ўсіх гэтых ператрусаў і цкаванняў кампаніі “Гавары праўду!” яны атрымалі нейкі доступ да маіх дакументаў, да нейкай інфармацыі і спрабавалі нешта знайсці. Але змаглі знайсці толькі гэтую даведку і вырашылі, што трэба чапляць. А потым, маўляў, разбярэмся і потым будзем нешта рабіць”.

Тое, што следства вялося з парушэннямі, пацвердзіла і адвакат Башуры Таццяна Сідарэнка.

Таццяна Сідарэнка: “На рапартах оперупаўнаважанага Нікіціна ад 6 жніўня нечакана для нас з’явіліся рэзалюцыі начальніка аддзела дазнання. Яны з’явіліся не тым днём, якім яны датаваныя. У матэрыялах справы па меры стрымання гэтых рэзалюцый не было. І другое. Спачатку распачалі справу па факце, што Башура прадставіў даведку ў банк з несапраўднымі дадзенымі, а потым, нібыта 9 жніўня, распачалі справу наконт таго, што Башура падрабіў гэтую даведку. А справу гэтую трэба было распачынаць, каб апраўдаць зняволенне Башуры. Я правяла аналіз матэрыялаў і прыйшла да высновы, што не магла гэтая пастанова аб пачатку справы з’явіцца 9 жніўня — яна з’явілася пазней”.



А схаваць за краты несумленнага “крэдытаатрымальніка”, кажа Башура, трэба было не толькі для таго, каб пакараць за нейкае зробленае ім злачынства. І ператрус у кватэры актывіста кампаніі рабілі не толькі для таго, каб знайсці “нажытыя несумленным шляхам” сродкі. Шукалі грошы “Гавары праўду!” і неаднаразова падчас допытаў распытвалі пра іх.

Міхась Башура: “Да мяне прыязджаў следчы, які вядзе справу ад 18 траўня (ператрус у офісе арганізацыі “Рух наперад”, якая з’яўляецца заснавальнікам кампаніі “Гавары праўду!” — ЕРБ). Ён лічыць, што яны ўсё ведаюць. Яны ведаюць і хто я, і чым я займаюся, і нават, ён лічыць, што ведае, колькі я атрымліваю грошай, працуючы ў кампаніі. Называў мне нейкія астранамічныя лічбы. Самае галоўнае — яны не могуць уцяміць: адкуль грошы?! І вось гэта пытанне іх больш за ўсё хвалюе. Я сумленна кажу: “Не ведаю”. А ён: “Ды ну!? Ты ж там не апошні чалавек!”. Але я не ведаю”.



Лідар кампаніі Ўладзімір Някляеў ухваліў такую трываласць Башуры — усмешкай даўшы зразумець, што і ад яго нічога новага пра грошы кампаніі ніхто не даведаецца. Нагадаем, яшчэ раней у размове з Еўрарадыё паэт заявіў, што кампанія існуе на грошы яго сябраў-бізнэсменаў — як тых, што вымушаныя былі з’ехаць за мяжу, так і тых, хто да гэтага часу застаецца тут.

Што ж тычыцца “справы Башуры” то Някляеў лічыць яе відавочна палітычнай.

Уладзімір Някляеў: “Ніякага дачынення да даведкі, па якой Міхась Башура так і не атрымаў ніякага крэдыту, яго арышт не мае. Бо па гэтых даведках, у якіх пераблытаныя некаторыя лічбы, можна было б перасаджаць калі не палову, то каля таго, тых людзей, якія бралі ў нашых умовах у нашых банках крэдыт. Арышт Башуры мае прамое дачыненне да палітыкі. А гэта азначае: да ягонага ўдзелу ў кампаніі “Гавары праўду!” — раз, і таго, што ён быў каардынатарам нашай кампаніі па Мінску — два”.



Дарэчы, згодна са словамі Башуры, за кратамі на Акрэсціна хапае і злодзеяў, і рабаўнікоў і іншых сапраўдных злачынцаў. Але больш за ўсіх — прадпрымальнікаў, з якіх улады штрафамі і канфіскацыямі імкнуцца выцягнуць як мага больш грошай.

Фота: Змітра Лукашука