Арменія дазволіла выехаць беларускай палітуцякачцы, абвешчанай у вышук

Арменія дазволіла выехаць беларусцы, якую абвясцілі ў міждзяржаўны вышук паводле палітычных матываў.

У 2020 годзе жанчына ўдзельнічала ў мірных масавых пратэстах і ўваходзіла ў кіраўніцтва аднаго з чатаў, удзельнікі якога абмяркоўвалі сітуацыю ў краіне. У Беларусі яе затрымлівалі паводле палітычных артыкулаў, і пасля допыту яна была вымушаная пакінуць радзіму, паведамляе ў сваім тг-канале Павел Латушка.

Падчас падарожжа ў 2025 годзе беларуска прызямлілася ў Арменіі. Там ёй заявілі, што з краіны яна выехаць не можа, бо рэжым Лукашэнкі абвясціў яе ў міждзяржаўны вышук.

У падтрымку беларускі выступілі Офіс Святланы Ціханоўскай, кіраўнік НАУ Павел Латушка, праваабарончы цэнтр "Вясна", фонды BySol і ByHelp, адвакатка Марыя Колесава-Гудзіліна, а таксама прававая камісія Каардынацыйнай рады. Юрыдычную падтрымку ў Арменіі беларусцы аказвала арганізацыя "Грамадскі вердыкт".

Пасля разгляду справы пракуратура Арменіі афіцыйна дазволіла нашай суайчынніцы пакінуць краіну. Цяпер беларуска ўжо прыбыла на тэрыторыю Еўрапейскага Саюза.