"Апошні раз я чула голас мужа больш за чатыры гады таму" — Ціханоўская

Кіраўніца Аб'яднанага пераходнага кабінета Беларусі Святлана Ціханоўская выказалася пра 700 дзён утрымання палітвязня Сяргея Ціханоўскага ў рэжыме інкамунікада.

"Апошні раз я чула голас мужа больш за чатыры гады таму, — піша яна. — У мяне было ўсяго пяць хвілінаў, каб падтрымаць яго, расказаць пра дзяцей, спытаць пра здароўе. Тады я яшчэ не ведала, што нам больш не дазволяць пагаварыць. Часта ўспамінаю тую размову і думаю, што яшчэ магла б сказаць…".

Ціханоўская нагадвае, што 700 дзён ад Сяргея няма навін. Яна не ведае, ці атрымлівае ён віншаванні з днём нараджэння, ці бачыў паштоўкі, намаляваныя дачкой.

"Не ведаю, калі зноў змагу пачуць ягоны голас, — піша Святлана Ціханоўская. — Нават адзін дзень без вестак ад блізкага чалавека – гэта ўжо нагода для трывогі. Разам з Карнеем і Агніяй мы жывём у гэтай трывозе ўжо некалькі гадоў. Але я ўпэўненая, што ён адчувае нашую падтрымку. Што ягоная ўнутраная сіла з ім. І нават за гэты час без сувязі — ён надае гэтую сілу і мне".

Ціханоўская абяцае, што ні яна, ні яе паплечнікі не спыняцца, пакуль Сяргей Ціханоўскі і ўсе іншыя палітвязні ў РБ не апынуцца на волі.

Блогер Сяргей Ціханоўскі быў затрыманы 29 траўня 2020 года на перадвыбарчым пікеце ў Гродне пасля арганізаванай сілавікамі правакацыі. Гэты дзень стаў пачаткам масавых перадвыбарчых рэпрэсій. Ціханоўскі быў асуджаны закрытым судом на 18 гадоў пазбаўлення волі. Потым яго перавялі на турэмны рэжым і прызначылі яшчэ 1,5 года пазбаўлення волі.