З Данецка ў Расію адпраўляюць целы 33 загінулых "апалчэнцаў"
Сярод 100 забітых баевікоў падчас баёў 26 траўня на тэрыторыі данецкага аэрапорта аказалася больш за тры дзясяткі расійскіх грамадзян.
Як паведамляе РІА "Новости", прадстаўнікі самаабвешчанай "Данецкай народнай рэспублікі" (украінскія ўлады прызналі яе тэрарыстычнай арганізацыяй) апазналі ўсіх гэтых людзей, устанавілі сувязь з іх сваякамі. У чацвер з данецкага морга целы расіян адправяць на радзіму.
Адзначаецца, што целы каля 15 забітых баевікоў застаюцца ляжаць каля аэрапорта, які кантралююць украінскія сілавікі, забраць іх пакуль не ўдаецца.
Нагадаем, сярод забітых у аэрапорце грамадзян Расіі апынуўся інструктар з элітнага цэнтра ФСБ Расіі Сяргей Ждановіч, які патрапіў на тэрыторыю Украіны нелегальна.
Фота — ria.ru, Facebook
