"Ён жывы, мы разам": Ціханоўская пра вызваленне мужа

Дэмакратычная лідарка Святлана Ціханоўская падзякавала прэзідэнту ЗША Дональду Трампу, а таксама амерыканскім палітыкам Кіту Келагу, Джону Кайлу і Крысу Сміту, дзякуючы якім 14 палітвязняў выйшлі з беларускіх турмаў. Сярод вызваленых — 4 беларуса, адзін з іх — муж Ціханоўскай Сяргей Ціханоўскі.

Дэмакратычная лідарка падзякавала таксама іншым сусветным лідарам, і асабістую ўдзячнасць выказала ў адрас Польшчы і Літвы, краінаў, якія прынялі шмат беларускіх палітычных уцекачоў.

"Для меня было эмацыйна і радасна ўбачыць мужа ўпершыню за 5 гадоў. Ён жывы, мы разам", — сказала Святлана Ціханоўская напачатку прэс-канферэнцыі, прысвечанай вызваленню 14 палітвязняў.

Ціханоўская назвала мужа сваім асабістым героем.

Яна нагадала, што больш за тысячу палітвязняў дагэтуль знаходзяцца ў беларускіх турмах.

"Мы працягнем цесную супрацу з адміністрацыяй прэзідэнта Трампа і з усімі нашымі саюзнікамі ў Еўропе па абодва бакі Атлантыкі, каб дамагчыся вызвалення палітвязняў. І апошняе вызваленне — не апошняе", — сказала Ціханоўская.

Яна напрамую звярнулася да Аляксандра Лукашэнкі і заклікала яго да вызвалення палітзняволеных.

Ціханоўская паўтарыла словы ўдзячнасці на англійскай мове.