У Мінску пачаўся закрыты суд над палітзняволенымі Калеснікавай і Знакам

Марыя Калеснікава з вясны 2020-га працавала ў штабе Віктара Бабарыкі, а пасля далучылася да каманды Святланы Ціханоўскай, удзельнічала ў яе паездках па краіне. У верасні 2020-га спецслужбы затрымалі Калеснікаву ў Мінску і спрабавалі вывезці ва Украіну, але яна адмовілася пакідаць Беларусь і парвала на мяжы свой пашпарт. З таго часу яна знаходзіцца ў зняволенні. Адвакат Максім Знак таксама быў у камандзе Бабарыкі. Яго затрымалі ў верасні мінулага года. На знак пратэсту супраць незаконнага затрымання ён абвяшчаў за кратамі галадоўку.

"Закрыты працэс і наша ізаляцыя — гэта пацвярджэнне страху і слабасці [ўлады], — піша Калеснікава. — Я чакаю пасяджэнне ў тым ліку, каб убачыць Максіма Знака. Абдыму і скажу, што ён — неверагодны".