Трамп пацвердзіў, што Зяленскі ў апошні дзень зімы будзе ў Вашынгтоне

Прэзідэнт ЗША Дональд Трамп пацвердзіў, што ўкраінскі прэзідэнт Уладзімір Зяленскі ў пятніцу, 28 лютага, будзе ў Вашынгтоне. Чакаецца падпісанне пагаднення аб рэдказямельных мінералах. У прамове на першым пасяджэнні свайго кабінета Трамп сказаў, што яны з Зяленскім "падпішуць пагадненне, якое будзе вельмі важным".

Пазней у вячэрнім звароце Уладзімір Зяленскі сказаў, што сапраўды ў пятніцу сустрэнецца з Дональдам Трампам.

У сераду быў апублікаваны поўны тэкст рамачнага пагаднення Украіны і ЗША аб карысных выкапнях. Яны збіраюцца стварыць сумесны інвестыцыйны фонд аднаўлення, кіраваць якім будуць абодва бакі. Пагадненне прадугледжвае, што ні адзін з удзельнікаў дамовы не будзе прадаваць, перадаваць якую-небудзь частку сваёй долі ў фондзе без папярэдняга пісьмовай згоды іншага ўдзельніка. Мяркуецца, што Украіна будзе ўносіць у фонд 50% усіх паступленняў, атрыманых ад будучай манетызацыі уласных прыродных актываў, якія знаходзяцца ў дзяржаўнай уласнасці.

Зяленскі пацвердзіў, што за рамачным пагадненнем з ЗША аб выкарыстанні карысных выкапняў будзе пагадненне аб сумесным інвестыцыйным фондзе, якое падлягае ратыфікацыі Украінай. Па словах украінскага прэзідэнта, у пытанні падрыхтоўкі пагаднення аб нетрах з ЗША для яго было галоўнае, "што мы не з'яўляемся даўжнікамі".